اقوام متحدہ نے کہا ہے کہ پاکستان کو منشیات کے خلاف جنگ میں اکیلا نہیں چھوڑا جا سکتا۔
اقوام متحدہ کے ادارہ برائے منشیات و جرائم نے پاکستان کی منشیات کے خلاف کارروائیوں کا عالمی سطح پر اعتراف کر لیا۔ پاکستان میں اقوامِ متحدہ ادارہ برائے منشیات و جرائم کے نمائندہ ٹرولز ویسٹر نے انسداد منشیات میں پاکستان کو فرنٹ لائن ملک قرار دیا۔
ٹرولز ویسٹر نے کہا کہ اینٹی نارکوٹکس فورس کی بڑی کامیابیاں ظاہر کرتی ہیں کہ پاکستان منشیات کے خلاف فرنٹ لائن ملک ہے۔ افغانستان میں پوست اور ہیروئن کی جگہ مصنوعی منشیات کی لیبارٹریاں قائم ہو رہی ہیں۔
انہوں نے کہا کہ اقوام متحدہ کے ادارہ برائے منشیات و جرائم نے انسداد منشیات سے متعلق اہم روڈ میپ بھی جاری کیا ہے۔ اور پاکستان کو منشیات کے خلاف جنگ میں اکیلا نہیں چھوڑا جا سکتا۔
اقوام متحدہ کے نمائندہ خصوصی نے کہا کہ منشیات کی اسمگلنگ روکنے کے لیے عالمی برادری کا پاکستان کے ساتھ اشتراک ناگزیر ہے۔
انہوں نے کہا کہ پاکستان نے ایک سال میں 365 میٹرک ٹن منشیات اور کیمیکل ضبط کیے۔ منظم جرائم کی بدلتی حکمت عملی کے تحت پاکستان کا کردار اس لڑائی میں کلیدی ہے۔
