پاکستانی باکسر قدرت اللہ نے ریاض میں جاری چھٹی اسلامک سولیڈیرٹی گیمز کے 55 کلوگرام باکسنگ ایونٹ کے سیمی فائنل میں جگہ بنا لی ہے، جس کے ساتھ ہی پاکستان کے لیے کانسی کا تمغہ بھی یقینی ہو گیا۔ دی پرومی نیڈ آرٹ ٹاور میں ہونے والے کوارٹر فائنل میں قدرت اللہ نے سوڈان کے محمد عثمان کو 0-10 کے واضح فرق سے شکست دی۔
خیبر پختونخوا سے تعلق رکھنے والے 20 سالہ باکسر 9 نومبر کو سیمی فائنل میں مصر کے عامر محمد فراگ احمد کیلانی کے مدمقابل ہوں گے۔
اس سے قبل، فاطمہ زہرا نے پاکستان کے لیے خواتین کے باکسنگ ایونٹ میں پہلا میڈل حاصل کیا۔ 19 سالہ فاطمہ زہرا نے 60 کلوگرام کے کوارٹر فائنل میں الجزائر کی حمدہ ملیسہ کو 0-5 سے شکست دی۔
وہ سیمی فائنل میں مصر کی حریف کے خلاف لڑیں گی۔
سوئمنگ ایونٹس میں، آرا نبی نے خواتین کے 50 میٹر بٹر فلائی میں 30.77 سیکنڈ کے ساتھ سیمی فائنل کے لیے کوالیفائی کیا، تاہم وہ فائنل تک رسائی حاصل نہ کر سکیں۔
ان کی ساتھی مشائل عائشہ حیات یوسف نے اپنی ہیٹ میں 31.42 سیکنڈ کے ساتھ پانچویں پوزیشن حاصل کی۔
مردوں کے 50 میٹر بٹر فلائی میں، علی محمد مٹھا اور سید محمد صادق ملک حاتم نے بالترتیب 26.31 اور 26.13 سیکنڈ کے ساتھ ساتویں پوزیشنیں حاصل کیں۔
ترکیہ کے برک اوزکُل نے 24.45 سیکنڈ کے وقت کے ساتھ سب سے بہترین کارکردگی دکھائی۔
فری اسٹائل ایونٹس میں حسین شوقی نے 50 میٹر ہیٹ میں 24.75 سیکنڈ کے ساتھ پانچویں پوزیشن حاصل کی، جبکہ سید محمد دانش خان چھٹے نمبر پر رہے (25.68 سیکنڈز)۔
پاکستان کی مکسڈ 4 ایکس 100 میٹر فری اسٹائل ریلے ٹیم نے اپنے ہیٹ میں 3 منٹ 55 سیکنڈز کے ساتھ تیسری پوزیشن حاصل کی۔
ٹیبل ٹینس میں پاکستان کی ویمن ٹیم کو گروپ ’سی‘ میں یوگنڈا کے ہاتھوں 4-8 سے شکست کا سامنا کرنا پڑا، ٹیم میں بسمہ فریال، حور فواد اور کلسوم خان شامل تھیں۔
