امریکی صدر ڈونلڈ ٹرمپ نے کہا ہے کہ پناہ گزینوں کی درخواستوں پر فیصلوں کی معطلی طویل مدت تک برقرار رہ سکتی ہے، اور اس پابندی کے خاتمے کے لیے کوئی مخصوص وقت طے نہیں کیا گیا۔ ایئر فورس ون میں صحافیوں سے گفتگو کرتے ہوئے ٹرمپ نے مؤقف اختیار کیا کہ "ہم اپنے ملک میں ایسے افراد کو نہیں چاہتے۔ ہمارے پاس پہلے ہی بے شمار مسائل ہیں۔"
ان کا کہنا تھا کہ تیسری دنیا کے کچھ ممالک جرائم سے بھرے ہوئے ہیں، اور جو حکومتیں اپنے عوام کی ذمہ داری پوری نہیں کر سکتیں، ان کے شہریوں کی امریکا میں ضرورت نہیں۔
گفتگو کے دوران ٹرمپ نے ڈیموکریٹ رکن کانگریس الہان عمر پر بھی تنقید کی۔ الہان عمر امریکی کانگریس کی پہلی صومالی نژاد رکن ہیں، جو تقریباً بیس سال قبل پناہ گزین کی حیثیت سے امریکا آئی تھیں۔
ٹرمپ ماضی میں بھی صومالیہ کو ان ممالک میں شمار کرتے رہے ہیں جن کے شہریوں کی ہجرت پر وہ اعتراض کرتے ہیں۔
یاد رہے کہ امریکا نے 2 روز قبل پناہ گزینوں سے متعلق تمام فیصلے روکنے کا اعلان کیاتھا۔
