نیویارک کے نومنتخب میئر ظہران ممدانی نے کہا ہے کہ صدر ٹرمپ کے بارے میں ملاقات سے پہلے جو کچھ کہا وہ اب بھی برقرار ہے۔ ایک انٹرویو میں جب ظہران ممدانی سے پوچھا گیا کہ کیا وہ صدر ٹرمپ کو فاشسٹ سمجھتے ہیں، اور ٹرمپ کو جمہوریت کا دشمن قرار دینے سمیت دیگر القابات کے حوالے سے ان کے بیانات پر موقف کیا ہے، تو انہوں نے واضح طور پر کہا کہ جو کچھ وہ پہلے کہہ چکے ہیں، اس پر قائم ہیں۔
ممدانی نے بتایا کہ امریکی صدر سے ملاقات میں نیویارک سٹی کے مسائل پر کھل کر بات ہوئی، جن میں امیگریشن، شہری رہائش، معیشت اور سکیورٹی جیسے امور شامل تھے۔
انہوں نے مزید کہا کہ وہ شہر کو محفوظ رکھنے کی پالیسی پر ماضی کی طرح قائم ہیں، تاہم مختلف علاقوں سے امیگریشن حکام کے چھاپوں اور گرفتاریوں کی اطلاعات موصول ہو رہی ہیں۔
واضح رہے کہ ظہران ممدانی ریپبلکن اور ٹرمپ کے حمایت یافتہ آزاد امیدوار کو شکست دے کر نیو یارک کے میئر منتخب ہوئے تھے، وہ یکم جنوری کو اپنا عہدہ سنبھالیں گے۔
