روس۔یوکرین جنگ کے حل کی کوششوں میں اہم پیش رفت سامنے آئی ہے، جہاں یوکرینی صدر ولادیمیر زیلنسکی نے سابق امریکی صدر ڈونلڈ ٹرمپ کے مجوزہ امن فریم ورک پر مذاکرات کے لیے آمادگی ظاہر کر دی ہے۔ اس پیش رفت سے طویل تنازعے کے خاتمے کی امیدیں مزید بڑھ گئی ہیں۔
ایک حالیہ بیان میں زیلنسکی کا کہنا تھا کہ وہ ٹرمپ کے منصوبے کے متنازع نکات پر براہِ راست گفتگو کے لیے تیار ہیں، تاکہ کسی بھی مجوزہ معاہدے میں یوکرین کی خودمختاری اور قومی سلامتی کو یقینی بنایا جا سکے۔
انہوں نے واضح کیا کہ کسی بھی امن کوشش کی بنیادی شرط یوکرین کی سرحدوں اور سلامتی کا تحفظ ہے۔
زیلنسکی کا یہ اعلان ایسے وقت سامنے آیا ہے جب روس نے امریکی امن تجویز کی حمایت کرتے ہوئے یوکرین کو خبردار کیا ہے کہ اگر معاہدہ ناکام ہوا تو ماسکو اپنی علاقائی پیش قدمی جاری رکھنے کا حق محفوظ رکھتا ہے۔
روسی صدر ولادیمیر پوتن نے کہا کہ ٹرمپ کا منصوبہ حتمی امن معاہدے کی بنیاد بن سکتا ہے، تاہم ان کے مطابق اس پر چند ترامیم ناگزیر ہیں جنہیں کیف روس نواز جھکاؤ قرار دے رہا ہے۔
یوکرینی صدر نے یورپی رہنماؤں سے مطالبہ کیا ہے کہ وہ جغرافیائی تحفظ کے لیے جنگ بندی کے بعد یورپی افواج کی ممکنہ تعیناتی کا واضح خاکہ پیش کریں، تاکہ روس کی دوبارہ جارحیت کو روکا جا سکے۔
یورپی یونین کی حالیہ میٹنگ کے دوران برطانوی وزیرِ اعظم کیئر اسٹارمر نے بھی اس خیال کی حمایت کی اور کہا کہ یورپی ممالک یوکرین کی سلامتی کے لیے عملی کردار ادا کرنے کو تیار ہیں۔
یوکرینی قیادت کا خیال ہے کہ امریکی منصوبہ جو ابتدائی طور پر 28 نکات پر مشتمل تھا، اب جنیوا اور ابوظہبی میں ہونے والی بات چیت سے 19 نکات تک محدود ہو گیا ہے، تاہم علاقائی چھوڑنے فوجی حدود اور نیٹو کی شمولیت جیسے حساس مسائل ابھی حل طلب ہیں۔
ٹرمپ نے ٹرتھ سوشل میڈیا پر لکھا کہ بہت بڑی پیش رفت ہوئی ہے صرف چند اختلافات باقی ہیں میں زیلنسکی اور پوتن سے ملاقات کا منتظر ہوں لیکن صرف جب معاہدہ حتمی مراحل میں ہو۔
امریکی صدر نے مزید کہا کہ میں نے 9 ماہ میں 8 جنگیں رکوائیں اور مزید ایک اور جنگ رُکنے کے قریب ہے۔
