امریکی صدر ڈونلڈ ٹرمپ نے تصدیق کی ہے کہ بھارت دوبارہ پاکستان پر جنگ مسلط کرنے کے قریب تھا۔ وائٹ ہاؤس میں سعودی ولی عہد محمد بن سلمان کے ساتھ گفتگو کرتے ہوئے ٹرمپ نے کہا کہ انہوں نے دنیا میں آٹھ بڑی جنگیں روکیں اور اس بات پر انہیں فخر ہے۔
صدر ٹرمپ کے مطابق انہوں نے نہ صرف پاکستان اور بھارت کے درمیان جاری تناؤ کو کم کیا بلکہ وہ جنگ بھی رکوائی جو دوبارہ بھڑکنے والی تھی۔
ان کا کہنا تھا کہ انہوں نے تجارت اور سفارتی روابط کو بنیاد بنا کر کئی تنازعات ختم کرائے، اور آج پاکستان اور بھارت دونوں مثبت اقدامات کر رہے ہیں۔
امریکی صدر نے روس—یوکرین جنگ کے جلد اختتام کی امید بھی ظاہر کی۔
ٹرمپ نے کہا کہ انہیں اندازہ نہیں تھا کہ روس اور یوکرین کے درمیان جنگ بندی کا عمل اتنا طویل ہو جائے گا۔
امریکی صدر نے صحافیوں سے گفتگو کے دوران ایران سے جوہری معاہدے سے متعلق بھی بات چیت کی۔
ڈونلڈ ٹرمپ نے کہا کہ ایران معاہدہ کرنا چاہتا ہے، میں اس کے لیے تیار ہوں اور اس حوالے سے ایران سے بات چیت کا آغاز ہوگیا ہے۔
