اگر آپ بھی اپنی واٹس ایپ پروفائل تصویر کو وقتاً فوقتاً تبدیل کرنا پسند کرتے ہیں تو آپ کے لیے خوشخبری ہے کہ جلد ہی یہ کام فیس بک اور انسٹاگرام کے ذریعے بھی ممکن ہوگا۔
فی الحال واٹس ایپ صارفین کو اپنی پروفائل تصویر تبدیل کرنے کے لیے یا تو کیمرے سے نئی تصویر لینا پڑتی ہے۔
گیلری سے کسی موجودہ تصویر کا انتخاب کرنا ہوتا ہے، یا پھر AI امیجز اور اوتار کا سہارا لینا پڑتا ہے۔
تاہم، ٹیکنالوجی ویب سائٹ ویب بیٹا انفو کی حالیہ رپورٹ کے مطابق، میٹا کی ملکیت واٹس ایپ جلد ہی ایک نیا فیچر متعارف کروانے جا رہی ہے۔
جس کے ذریعے صارفین فیس بک اور انسٹاگرام سے اپنی پروفائل تصاویر براہِ راست واٹس ایپ پر امپورٹ کر سکیں گے۔
ذیل میں دیے گئے اسکرین شاٹ میں اینڈرائیدفون کے واٹس ایپ کے پروفائل مینو میں فیس بک اور انسٹاگرام سے براہ راست پروفائل تصاویر امپورٹ کرنے کے لیے 2 نئے آپشن دیکھے جاسکتے ہیں ۔
ویب بیٹا انفو کے مطابق یہ فیچر آپشنل ہے جسے صارف اپنی مرضی سے آف بھی کرسکیں گے تاہم فیس بک/انسٹاگرام سے پروفائل فوٹوز کو براہ راست امپورٹ کرنے سے واٹس ایپ صارفین کی سکیورٹی متاثر نہیں ہوگی۔
یہ خصوصیت واٹس ایپ کے اینڈرائیڈ کے بیٹا ورژن 2.25.21.23 میں دیکھی گئی ہے جو فی الحال کچھ بیٹا ٹیسٹرز کے لیے دستیاب ہے تاہم تمام ورژن کیلئے نیا فیچر کب دستیاب ہوگا اس حوالے سے ویب بیٹا انفو پر تاریخ سامنے نہیں آسکی ہے۔
واضح رہےکہ یہ فیچر فی الحال فیس بک اور انسٹاگرام پر موجود ہے، اس فیچر کے تحت صارفین کسی ایک پلیٹ فارم پر پکچر چینج کرلیں تو دوسرے پلیٹ فارم پر بھی تصویر تبدیل ہوجاتی ہے۔
