اوپن اے آئی، جس نے چیٹ جی پی ٹی بنایا ہے، اور ایک آسٹریلوی ڈیٹا سینٹر آپریٹر نے سڈنی میں اربوں ڈالر مالیت کے اے آئی مرکز کے قیام کا معاہدہ کر لیا ہے۔ برسبین میں ہیڈکوارٹر رکھنے والی کمپنی نیکسٹ ڈی سی نے جمعہ کو اعلان کیا کہ اس نے اوپن اے آئی کے ساتھ مصنوعی ذہانت کے کیمپس اور گرافکس پروسیسنگ یونٹس کے ‘سپر کلسٹر’ کے قیام کے لیے مفاہمت کی یادداشت پر دستخط کیے ہیں۔
نیکسٹ ڈی سی کے مطابق، دونوں کمپنیاں مغربی سڈنی میں اے آئی انفراسٹرکچر کی منصوبہ بندی، ترقی اور آپریشن میں تعاون کریں گی۔
خبر ملنے کے بعد نیکسٹ ڈی سی کے حصص میں جمعے کے ابتدائی اوقات میں 4.1 فیصد اضافہ ہوا۔
آسٹریلوی حکومت نے بتایا کہ یہ منصوبہ 7 ارب آسٹریلوی ڈالر (تقریباً 4.6 ارب امریکی ڈالر) مالیت کا ہے اور تعمیراتی مراحل میں ہزاروں براہِ راست اور بالواسطہ ملازمتیں پیدا کرے گا۔
منصوبے کے مکمل ہونے کے بعد یہ ٹیکنالوجی، مینوفیکچرنگ، انجینئرنگ اور آپریشنز کے شعبوں میں بھی ملازمتیں فراہم کرے گا۔
حکومت کے مطابق اس منصوبے میں قابلِ تجدید توانائی کے ذرائع کے لیے طویل مدتی پاور پرچیز ایگریمنٹس شامل ہوں گے اور نئے فیچرز جیسے پانی کے بغیر ٹھنڈک کا نظام بھی استعمال کیا جائے گا۔
خزانچی جم چالمرز نے کہا، "یہ منصوبہ ثبوت ہے کہ آسٹریلیا میں ٹیلنٹ، صاف توانائی کی صلاحیت، تجارتی شراکت داری اور مضبوط پالیسی کے انتظامات موجود ہیں جو اسے اے آئی کے شعبے میں نمایاں کامیابی حاصل کرنے والے ممالک میں شامل کر سکتے ہیں۔"
انہوں نے مزید کہا کہ ’اس قسم کی شراکت داریاں اچھی ملازمتیں پیدا کرنے، مہارتیں بڑھانے، اور اے آئی کو ہماری معیشت میں وسیع پیمانے پر اپنانے میں مدد کریں گی‘۔
