اقوام متحدہ میں پاکستان کے قونصلر گل قیصر سروانی نے بھارت کو دوٹوک انداز میں آگاہ کرتے ہوئے کہا ہے کہ کشمیر نہ کبھی بھارت کا تھا اور نہ ہی ہوگا۔ سلامتی کونسل کے اجلاس سے خطاب کے دوران انہوں نے بھارتی نمائندے کے بیان پر سخت ردِعمل دیتے ہوئے کہا کہ جموں و کشمیر ایک بین الاقوامی طور پر تسلیم شدہ متنازع خطہ ہے۔
پاکستانی قونصلر نے کہا کہ ریاستی سرپرستی میں دہشت گردی کے ساتھ ساتھ بھارت ہی وہ ملک ہے جو بارہا پاکستان کے خلاف جارحانہ اقدامات کا مرتکب رہا ہے۔ ان کے مطابق بھارتی ریاست کا یہ رویہ ایک روگ ایکٹر کی ذہنیت کی عکاسی کرتا ہے۔
گل قیصر سروانی نے بتایا کہ ٹھوس شواہد موجود ہیں کہ بھارت کی سرپرستی میں سرگرم دہشت گرد گروہوں میں تحریک طالبان پاکستان (ٹی ٹی پی) اور بلوچ لبریشن آرمی (بی ایل اے) شامل ہیں، جو پاکستان کے اندر مختلف دہشت گردانہ حملوں میں ملوث رہے ہیں۔
انہوں نے مزید کہا کہ بھارت کی جانب سے پاکستان کے خلاف بارہا کی گئی جارحیت بین الاقوامی قانون اور اقوام متحدہ کے چارٹر کی صریح خلاف ورزی ہے۔ پاکستانی قونصلر نے ایک بار پھر مطالبہ کیا کہ بھارت ریاستی سرپرستی میں ہونے والی دہشت گردی کا فوری طور پر خاتمہ کرے۔
سندھ طاس معاہدے سے متعلق بھارتی موقف پر ردِعمل دیتے ہوئے پاکستانی نمائندے نے کہا کہ بھارت حقائق کو جان بوجھ کر مسخ کر رہا ہے اور ایک بین الاقوامی معاہدے کی غلط تشریح کر رہا ہے۔ انہوں نے واضح کیا کہ سندھ طاس معاہدے کی کسی بھی شق میں یکطرفہ طور پر معطلی یا ترمیم کی کوئی گنجائش موجود نہیں۔
