وزیراعظم شہباز شریف نے کہا ہے کہ پاکستان اور بھارت کے درمیان اب تک چار جنگیں ہو چکی ہیں جن پر اربوں ڈالر خرچ ہوئے، جو کہ عوام کی ترقی اور خوشحالی پر خرچ ہونے چاہیے تھے۔ لندن میں اوورسیز پاکستانیز فاؤنڈیشن کی تقریب سے خطاب کرتے ہوئے وزیراعظم نے کہا کہ پاکستان اور بھارت ہمسائے ہیں اور ہمیں ساتھ رہنا ہوگا۔
انہوں نے کہا کہ بھارت سے بات چیت برابری کی بنیاد پر ہونی چاہیے اور مسئلہ کشمیر حل کیے بغیر پاک بھارت تعلقات قائم نہیں ہو سکتے۔
وزیراعظم نے زور دیا کہ کشمیریوں کا خون رائیگاں نہیں جائے گا۔ اس موقع پر انہوں نے اوورسیز پاکستانیوں کو خراج تحسین پیش کیا اور اشعار بھی سنائے۔
برطانیہ کے دورے پر لندن میں اپنے چار روزہ قیام کے دوران وزیراعظم نے پاکستانی کمیونٹی اور تاجر رہنماؤں سے ملاقاتیں کیں۔
وفاقی وزیر اطلاعات عطا تارڑ کے مطابق، وزیراعظم کا خطاب آج دوپہر نشر کیا جائے گا۔
انہوں نے بتایا کہ وزیراعظم نے پرجوش تقریر کی ۔لوگوں کی بڑی تعداد نے شرکت کی ۔وزیراعظم نے آپریشن بنیان مرصوص ،معیشت اور سفارتی تعلقات پر بات کی۔
واضح رہے کہ وزیر اعظم شہباز شریف اقوام متحدہ کی جنرل اسمبلی کے اجلاس میں شرکت کے لیے آج لندن سے امریکا روانہ ہوں گے ۔
وزیراعظم اقوام متحدہ کی جنرل اسمبلی سے خطاب کریں گے اور غزہ پر خصوصی اجلاس میں بھی شریک ہوں گے۔
وزیراعظم دورۂ امریکا میں مسئلہ کشمیر، فلسطین اور قطر پر حملے سے متعلق پاکستان کا مؤقف پیش کریں گے ۔
