پاکستان کرکٹ بورڈ (پی سی بی) نے اعلان کیا ہے کہ پی ایس ایل کے آئندہ سیزن کے لیے دو نئی ٹیموں کی نیلامی 6 جنوری کو ہوگی۔ پی ایس ایل حکام کے مطابق نیلامی میں صرف وہ بولی دہندگان شریک ہو سکتے ہیں جو تکنیکی طور پر اہل ہوں۔
پی ایس ایل میں شامل ہونے والی نئی فرنچائزز کے لیے چھ ممکنہ شہروں کی فہرست بھی جاری کر دی گئی ہے، جس میں فیصل آباد، راولپنڈی، حیدرآباد، سیالکوٹ، مظفرآباد اور گلگت کے نام شامل ہیں۔
پی سی بی نے دو نئی ٹیموں کے طور پر فیصل آباد اور گلگت کے فائنل ہونے کی افواہوں کی تردید کرتے ہوئے واضح کیا کہ نئی فرنچائزز کے لیے یہ چھ شہر ہی شارٹ لسٹ کیے گئے ہیں۔
بولیاں 15 نومبر کو پبلک ٹینڈر کے ذریعے کھولی جائیں گی، جبکہ تکنیکی تجاویز جمع کرانے کی آخری تاریخ 15 دسمبر مقرر کی گئی ہے۔
پی ایس ایل میں دو نئی ٹیمیں کون سی ہوں گی؟
پی ایس ایل کے چیف ایگزیکٹیو آفیسر سلمان نصیر کا کہنا ہے کہ لیگ عالمی معیار کی ٹی ٹوئنٹی لیگ کے طور پر ترقی کر رہی ہے، نئی ٹیموں کے اضافے سے اس کی مقبولیت اور معیار مزید بڑھے گا۔
پی سی بی نے واضح کیا ہے کہ نئی فرنچائزز کی نیلامی کا مقصد لیگ کو مزید وسعت دینا اور ملک بھر میں کرکٹ کے فروغ کو یقینی بنانا ہے۔
اس اقدام کے بعد لیگ میں کھیلنے والے شہروں کی تعداد میں اضافہ ہوگا اور شائقین کے لیے نئے مواقع پیدا ہوں گے۔
