پی ایس ایل: بابراعظم پشاور زلمی میں شامل

بابراعظم بابراعظم

پاکستان سپر لیگ (پی ایس ایل) کی ٹیموں کی جانب سے کھلاڑیوں کے حصول کا اعلان کردیا گیا اور پشاور زلمی نے کہا ہے کہ قومی ٹیم کے کپتان اور مایہ ناز بلے باز بابراعظم آٹھویں سیزن میں ان کی ٹیم کا حصہ ہوں گے۔

سماجی رابطے کی ویب سائٹ ٹوئٹر پر جاری بیان میں پشاور زلمی نے کہا کہ بابراعظم کو پشاور زلمی میں خوش آمدید کہتے ہیں۔

بابراعظم پی ایس ایل میں کراچی کنگز کی نمائندگی کرتے ہیں جہاں ان کی ٹیم عماد وسیم کی قیادت میں 2020 کے سیزن میں چمپیئن بنی تھی تاہم اس کے بعد 2021 میں بابر کو ٹیم کا کپتان مقرر کیا گیا تھا۔

کراچی کنگز بابراعظم کی قیادت میں کراچی کنگز کی ٹیم خاطر خواہ کارکردگی دکھانے میں ناکام ہوئی تھی اور رواں برس کھیلے گئے سیزن کے فائنل تک رسائی حاصل نہیں کرپائی تھی۔

خیال رہے کہ پی ایس ایل 8 کا آغاز 9 فروری 2023 کو ہوگا اور 19 مارچ کو فائنل کھیلا جائے گا، آٹھویں سیزن کے میچز کراچی، لاہور، ملتان اور راولپنڈی میں کھیلے جائیں گے۔

پی ایس ایل 7 میں لاہور قلندرز نے فائنل میں دو دفعہ کی چمپیئن اسلام آباد یونائیٹڈ کو سنسنی خیز مقابلے کے بعد شکست دے کر پہلی دفعہ ٹائٹل حاصل کیا تھا۔

لاہور قلندرز اور اسلام آباد یونائیٹڈ کے درمیان فائنل قذافی اسٹیڈیم لاہور میں کھیلا گیا تھا۔

subscribe YT Channel install suchtv android app on google app store