غیر ملکی کھلاڑیوں کی ترجیح انڈین پریمیئر لیگ (آئی پی ایل) کی بجائے پاکستان سپر لیگ (پی ایس ایل) کی جانب ہونے سے پی ایس ایل کی مقبولیت میں مزید اضافہ ہوا ہے۔ انگلینڈ کے کرکٹر ڈیوڈ ولے نے بھارتی میڈیا کو دیے گئے ایک انٹرویو میں کہا کہ پی ایس ایل کھلاڑیوں کے لیے سکیورٹی کے لحاظ سے بہترین ہے، جبکہ آئی پی ایل کی سکیورٹی کے بارے میں واضح نہیں کہا جا سکتا۔
ولے نے کہا کہ ہر کھلاڑی کی اپنی ترجیحات اور حالات ہوتے ہیں۔ بعض کھلاڑی محسوس کرتے ہیں کہ پی ایس ایل میں انہیں کھیلنے کے زیادہ مواقع ملیں گے، جبکہ آئی پی ایل میں وہ 10 سے 11 ہفتے تک بینچ پر بیٹھے رہ سکتے ہیں۔
انہوں نے مزید کہا کہ پی ایس ایل کھلاڑیوں کو کھیلنے کی یقین دہانی کے ساتھ ساتھ بہتر حفاظتی ماحول بھی فراہم کرتی ہے، جس کی وجہ سے غیر ملکی کھلاڑی اس لیگ کو ترجیح دینے لگے ہیں۔
واضح رہے کہ فاف ڈو پلیسی اور معین علی آئی پی ایل چھوڑ کر پی ایس ایل کھیلنے کا اعلان کرچکے ہیں۔
دوسری جانب آسٹریلیا کے گلین میکسویل نے بھی رواں سال آئی پی ایل نہ کھیلنے کا اعلان کیا ہے جس کے بعد میکسویل کی بھی پی ایس ایل کھیلنے کے حوالے سے خبریں گردش کررہی ہیں۔
