سکیورٹی فورسز نے خیبر پختونخوا میں دو الگ الگ کارروائیوں میں بھارتی حمایت یافتہ 9 دہشت گرد ہلاک کر دیے ہیں۔ پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے ضلع ٹانک میں خفیہ اطلاعات کی بنیاد پر ایک مؤثر آپریشن انجام دیا، جس میں فتنۃ الخوارج کے ٹھکانے کو نشانہ بنایا گیا۔ ٹانک میں شدید فائرنگ کے تبادلے کے دوران 7 دہشت گرد مارے گئے۔
آئی ایس پی آر نے بتایا کہ لکی مروت میں بھی خفیہ اطلاعات پر کارروائی کی گئی، جس میں 2 بھارتی حمایت یافتہ خوارج ہلاک ہوئے۔ مارے گئے دہشت گردوں سے اسلحہ اور گولہ بارود بھی برآمد کیا گیا، اور وہ دہشت گردانہ سرگرمیوں میں ملوث تھے۔
آئی ایس پی آر کے مطابق دہشت گرد نیٹ ورک کے مکمل خاتمے کے لیے متعلقہ علاقوں میں کلیئرنس آپریشنز جاری ہیں، اور یہ اقدامات ملک سے دہشت گردی کے ناسور کو ختم کرنے تک جاری رہیں گے۔
صدر آصف علی زرداری، وزیر اعظم شہباز شریف اور وفاقی وزیر داخلہ محسن نقوی نے خیبرپختونخوا میں کامیاب کارروائیوں پر سکیورٹی فورسز کو خراج تحسین پیش کرتے ہوئے فورسز کی پیشہ وارانہ مہارت کو سراہا۔
تینوں شخصیات کا کہنا تھا سکیورٹی فورسز نے بروقت کارروائیاں کرکے خوارجیوں کو ہلاک کیا، خوارجیوں کے ناپاک عزائم کو خاک میں ملانے پر سکیورٹی فورسز کوخراج تحسین پیش کرتا ہوں، سکیورٹی فورسز کی جرات اور پیشہ ورانہ مہارت پر فخر ہے، فتنہ الخوارج کے خلاف سکیورٹی فورسز بڑی کامیابیاں سمیٹ رہی ہیں، خیبرپختونخوا میں قیام امن کیلئے فورسز پرعزم ہیں۔
