سول ایوی ایشن اتھارٹی کا کیٹیگری سی کے مسافروں کی آمد پر پابندی میں توسیع کا فیصلہ

تفصیلات کے مطابق کرونا وائرس کے پیش نظر سول ایوی ایشن اتھارٹی کی جانب سے مسافروں کی سہولت کےلیے بنائی گئی کیٹیگری اے اور بی ختم کردی جب کہ کیٹیگری سی میں شامل 23 ممالک کے مسافروں کی آمد پر پابندی کی مدت میں توسیع کردی۔

ذرائع کا کہنا ہے کہ پاکستان کے تمام بین الاقوامی ایئرپورٹس پر مسافروں کا ریپڈاینٹیجنٹ ٹیسٹ ہوگا، جس کی رپورٹ 20 منٹ کے اندر اندر حاصل ہوگی۔

ذرائع کے مطابق ٹیسٹ کی رپورٹ مثبت آنے پر مسافر کو اپنے خرچے پر قرنطینہ کیا جائے گا، جس کے 8 دن بعد دوبارہ ٹیسٹ ہوگا اور ٹیسٹ منفی آنے پر گھر جانے کی اجازت ہوگی۔

سول ایوی ایشن اتھارٹی نے کیٹیگری سی میں شامل 23 ممالک کے مسافروں کی آمد پر پابندی کی مدت میں توسیع کرتے ہوئے کہا کہ مذکورہ کیٹیگری میں شامل ممالک کے مسافروں پر سفری پابندیاں 5 مئی سے تاحکم ثانی نافذ ہوں گی۔

خیال رہے کہ کیٹیگری سی میں جنوبی افریقہ، برازیل، زمبابوے اور بھارت سمیت 23 ممالک شامل ہیں۔

نئی ٹریول ایڈوئزری این سی او سی کے فیصلوں کے تناظر میں جاری کی گئی البتہ سی کیٹیگری ممالک سے آمد کی اجازت این سی او سی کے این او سی سے مشروط ہے جب کہ ان ممالک میں موجود پاکستانی، نائیکوپ اور پی او سی کارڈ ہولڈرز کی آمد پر بھی پابندی برقرار ہے۔