وزارت دفاع نے فیلڈ مارشل سید عاصم منیر کو بطور چیف آف ڈیفنس فورسز تعینات کرنے اور ائیر چیف مارشل ظہیر احمد بابر سدھو کی مدت ملازمت میں توسیع کا نوٹیفکیشن جاری کر دیا ہے۔ گزشتہ روز صدر مملکت آصف علی زرداری نے وزیر اعظم کی سفارش پر فیلڈ مارشل سید عاصم منیر کی بطور چیف آف ڈیفنس فورسز تعیناتی کی منظوری دی تھی۔
صدر کی منظوری کے بعد وزارت دفاع نے بھی فیلڈ مارشل عاصم منیر کی پانچ سالہ مدت کے لیے تعیناتی کا سرکاری نوٹیفکیشن جاری کر دیا ہے۔
اسی طرح وزارت دفاع نے ائیر چیف مارشل ظہیر احمد بابر کی بطور سربراہ پاک فضائیہ مدت ملازمت میں دو سال کی توسیع کا نوٹیفکیشن بھی جاری کر دیا ہے۔
صدر مملکت نے ائیرچیف مارشل ظہیر احمد سدھو کی مدت ملازمت میں بھی 2 سال کی توسیع کی منظوری دی تھی، اعلامیے کے مطابق ائیر چیف کی توسیع شدہ مدت ملازمت 19مارچ2026 سے شروع ہوگی۔
