اقوام متحدہ میں پاکستان کے مستقل مندوب عاصم افتخار نے غزہ میں تنازع کے خاتمے کے لیے صدر ٹرمپ کے پیش کردہ غزہ منصوبے کا خیرمقدم کیا ہے۔ سلامتی کونسل سے خطاب کرتے ہوئے انہوں نے منصوبے میں جنگ بندی کے لیے کیے گئے اقدامات کو قابلِ ستائش قرار دیا اور کہا کہ اس معاہدے کے نتیجے میں غزہ میں جاری لڑائی ختم ہوئی ہے۔
سلامتی کونسل میں ٹرمپ کے غزہ منصوبے کی حمایت میں قرارداد بھی منظور کر لی گئی، جس کے حق میں پاکستان نے ووٹ ڈالا۔
عاصم افتخار نے کہا کہ ہمارا بنیادی ہدف معصوم فلسطینیوں کے قتل عام کی روک تھام اور غزہ سے اسرائیلی فورسز کا مکمل انخلا ہے۔
انہوں نے بتایا کہ یہ منصوبہ غزہ کے لیے امن کی نئی امید لے کر آیا ہے اور مذاکرات کے دوران پاکستان نے عرب ممالک کی تجاویز کی حمایت کے ساتھ اپنی آراء بھی شامل کیں۔
پاکستانی مندوب نے واضح کیا کہ 1967 کی سرحدوں کے مطابق ایک آزاد فلسطینی ریاست کا قیام پاکستان کا اصولی مؤقف ہے اور اس ریاست کا دارالحکومت القدس ہونا چاہیے۔
یاد رہے کہ اقوام متحدہ کی سلامتی کونسل میں امریکی صدر ڈونلڈ ٹرمپ کے غزہ منصوبے کی حمایت میں قرارداد منظور کرلی گئی۔
قرار داد کے حق میں 14 ووٹ آئے جبکہ مخالفت میں کوئی ووٹ نہیں آیا، روس اور چین نے ووٹنگ کے عمل میں حصہ نہیں لیا۔
امریکی مندوب نے سلامتی کونسل میں پاکستان، مصر، قطر، اردن، سعودی عرب، یواے ای، ترکیے اور انڈونیشیا سے تشکر کا اظہار کیا۔
