اگر آپ دوڑتے ہوئے پاؤں میں موچ لے بیٹھے ہیں یا دفتر میں کئی گھنٹے کام کرنے کے بعد گردن میں سختی محسوس ہو رہی ہے، تو سب سے پہلا سوال یہ آتا ہے: آئس پیک یا ہیٹ پیڈ استعمال کروں؟ حقیقت یہ ہے کہ یہ انتخاب عادت یا پسند پر نہیں بلکہ چوٹ کی نوعیت اور وقت پر منحصر ہوتا ہے۔
سرد اور گرم علاج ایک دوسرے کے دشمن نہیں بلکہ معاون ہیں۔ ہر طریقہ علاج کا اپنا مخصوص وقت اور مقصد ہوتا ہے۔
ایک کو فوری طور پر استعمال کرنا ضروری ہے تاکہ سوجن اور درد کم ہو، جبکہ دوسرا پٹھوں کو سکون دینے اور چوٹ کی حالت بہتر کرنے کے لیے مؤثر ہے۔
آئس پیک کب استعمال کریں؟
اگر اچانک چوٹ لگ جائے جیسے پاؤں مروڑنا، پٹھوں میں کھچاؤ یا کوئی شدید چوٹ، تو فوراً آئس پیک یا سرد کمپریس کا استعمال کریں، خاص طور پر پہلے 24 سے 72 گھنٹوں کے دوران۔
ٹھنڈک خون کی نالیوں کو سکڑنے میں مدد دیتی ہے، جس سے سوجن اور درد کم ہوتا ہے اور فوری آرام ملتا ہے۔
آئس پیک استعمال کرنے کا طریقہ
آئس پیک یا فریز سبزیوں کے بیگ کو نرم تولیے میں لپیٹیں۔
چوٹ والے حصے پر 15 سے 20 منٹ تک لگائیں، پھر ہٹا دیں۔
اسے 2-3 دن تک ہر چند گھنٹے بعد دہرائیں۔
یہ طریقہ خاص طور پر اچانک چوٹ، موچ، پٹھوں کے کھچاؤ، نیل لگنے یا کھیلوں اور ورزش کے دوران چوٹ لگنے پر مؤثر ہے۔
اہم نکات:
آئس پیک کو کبھی بھی براہِ راست جلد پر نہ لگائیں۔
15-20 منٹ سے زیادہ استعمال نہ کریں۔
خون کی روانی یا اعصابی مسائل والے افراد کے لیے سرد علاج مناسب نہیں۔
ہیٹ پیڈ سے علاج: کب اور کیسے؟
چوٹ کی سوجن کم ہونے کے بعد (تقریباً 48 سے 72 گھنٹے کے بعد)، پٹھوں کو آرام دینے اور خون کی روانی کو بہتر بنانے کے لیے ہیٹ کا استعمال فائدہ مند ہوتا ہے۔
ہیٹ پیڈ یا ہیٹ پیک پٹھوں کی سختی اور درد کو کم کرتے ہیں، خاص طور پر اگر آپ کو طویل عرصے سے درد یا اکڑن کا سامنا ہو۔
ہیٹ پیک استعمال کرنے کا طریقہ
گرم پانی کی بوتل یا ہیٹ پیڈ کا استعمال کریں۔
اسے تولیے میں لپیٹ کر 15-20 منٹ تک متاثرہ حصے پر لگائیں۔
اس دوران جلد کو چیک کرتے رہیں تاکہ جلنے کا خطرہ نہ ہو۔
پٹھوں کی سختی یا درد، طویل وقت تک بیٹھے رہنے یا کام کرنے کی وجہ سے ہونے والی اکڑن ، دائمی جوڑوں یا کمر کا درد ہونے کی صورت میں ہیٹ پیک کا استعمال مفید رہتا ہے۔
یہ بات ذہن میں رکھیں کہ ہیٹ پیڈ کا استعمال سوجن کے دوران یا کسی نئی چوٹ کے لیے نہیں کرنا چاہیے۔
گرمی زیادہ دیر تک استعمال نہ کریں تاکہ جلد پر نقصان نہ ہو۔
کیا آئس اور ہیٹ کا باری باری استعمال کیا جاسکتا ہے؟
جی ہاں، لیکن اس میں احتیاط ضروری ہے۔ سردی اور گرمی کا متبادل طریقہ (جسے ”کنٹراسٹ تھراپی“ کہتے ہیں) عام طور پر پٹھوں کے درد یا چوٹ کے بعد استعمال کیا جاتا ہے۔
اس میں پہلے ہیٹ، پھر آئس لگائی جاتی ہے تاکہ خون کی روانی بڑھ سکے اور سوجن کم ہو۔
متبادل طریقہ:
پہلے گرم پٹہ لگائیں (پٹھوں کو آرام دینے کے لیے)
پھر آئس لگائیں (سوجن اور درد کم کرنے کے لیے)
یہ عمل اپنے جسم کی برداشت کے مطابق دہرائیں۔
اگر آپ کو کوئی تازہ چوٹ لگی ہو تو ٹھنڈک (آئس) کا استعمال فوراً کریں تاکہ سوجن اور درد کم ہو سکے۔ جیسے ہی سوجن کم ہو جائے، گرمی (ہیٹ) کا استعمال پٹھوں کی آرام دہ حالت کے لیے فائدہ مند ہوتا ہے۔
ہمیشہ اپنے جسم کی ضرورت کے مطابق علاج کا انتخاب کریں، اور اگر چوٹ کا درد یا سوجن زیادہ دن تک برقرار رہے، تو فوراً ڈاکٹر سے مشورہ کریں۔
