پاکستان کی فضائی حدود کی بندش کے باعث بڑھتے ہوئے اخراجات اور طویل پروازوں سے پریشان ایئر انڈیا نے بھارتی حکومت سے مالی سبسڈی کے ساتھ ساتھ یہ بھی درخواست کی ہے کہ چین سے بات چیت کر کے سنکیانگ کی فضائی حدود کے استعمال کی اجازت حاصل کی جائے، تاکہ موجودہ مالی دباؤ کو کم کیا جا سکے۔
خبر رساں ادارے رائٹرز کے مطابق پاکستان کی جانب سے فضائی حدود بند کیے جانے کے بعد بھارتی ایئرلائنز، خصوصاً ایئر انڈیا، شدید مشکلات کا سامنا کر رہی ہیں۔
ایئر انڈیا نے حکومت کو تحریری طور پر کہا ہے کہ چین کے صوبے سنکیانگ کے فوجی کنٹرول والے فضائی علاقے تک رسائی کے لیے بیجنگ سے مذاکرات کیے جائیں۔
رپورٹ میں بتایا گیا کہ پابندی کے بعد ایئر انڈیا کے اخراجات میں بے پناہ اضافہ ہوا ہے، جبکہ کئی لمبے روٹس پر پروازوں کا دورانیہ تقریباً تین گھنٹے بڑھ چکا ہے۔
یہ صورتحال ایسے وقت میں سامنے آئی ہے جب بھارت اور چین کے درمیان تقریباً پانچ سال بعد براہِ راست پروازیں حال ہی میں بحال ہوئی ہیں۔
اعداد و شمار کے مطابق پاکستان کی فضائی پابندی کے نتیجے میں ایئر انڈیا کو ایندھن پر 29 فیصد زیادہ لاگت برداشت کرنا پڑ رہی ہے، اور بعض روٹس کا دورانیہ بھی نمایاں طور پر بڑھا ہے۔
صرف ایئر انڈیا کو سالانہ 45 کروڑ ڈالر (40 ارب روپے سے زائد) کا نقصان ہو رہا ہے، جبکہ مالی سال 2024-25 میں مجموعی نقصان 44 کروڑ ڈالر (تقریباً 39 ارب روپے) رہا۔
فضائی حدود بند ہونے کے باعث ایئر انڈیا کو دہلی سے واشنگٹن کے لیے سروس اگست میں معطل کرنا پڑی۔
اس کے علاوہ ممبئی اور بنگلور سے سان فرانسسکو کی پروازوں میں بھی تین گھنٹے کا اضافہ ہو گیا، جس کے باعث مسافر غیر ملکی ایئرلائنز کا رخ کر رہے ہیں۔
ایئر انڈیا کے مطابق اگر چین سنکیانگ کی فضائی پٹی کھول دے تو ایندھن میں اضافی اخراجات اور طویل سفر دونوں میں کمی آئے گی، اور کئی روٹس دوبارہ مؤثر انداز میں چلائے جا سکیں گے۔
ایئرلائن نے بھارت حکومت سے یہ درخواست بھی کی ہے کہ جب تک پاکستان کی فضائی حدود نہیں کھلتیں، تب تک اسے عارضی سبسڈی فراہم کی جائے تاکہ بھاری مالی بوجھ کم ہو سکے۔
واضح رہے کہ پاکستان نے دونوں ممالک کے درمیان کشیدگی بڑھنے کے بعد بھارتی پروازوں کے لیے اپنی فضائی حدود بند کی تھیں، جس کے نتیجے میں بھارتی ایئرلائنز کو طویل اور مہنگے متبادل روٹس اختیار کرنا پڑ رہے ہیں۔
