سہ ملکی سیریز: پاکستان نے افتتاحی میچ میں زمبابوے کو 5 وکٹوں سے ہرادیا

راولپنڈی میں کھیلے گئے اس میچ میں پاکستان نے ٹاس جیت کر پہلے فیلڈنگ کا فیصلہ کیا تھا۔

پہلی اننگز میں زمبابوے نے 8 وکٹوں کے نقصان پر 147 رنز اسکور کیے۔ اوپنر برائن بینٹ نے 49 رنز کی عمدہ اننگز کھیلی، جبکہ کپتان سکندر رضا نے 34 رنز کا تعاون دیا۔

پاکستان کی جانب سے محمد نواز نے 2 کھلاڑیوں کو آؤٹ کیا، جبکہ صائم ایوب، ابرار احمد، سلمان مرزا اور شاہین شاہ آفریدی نے ایک ایک وکٹ حاصل کی۔

ہدف کے تعاقب میں پاکستان کی بیٹنگ کے دوران فخر زمان نے 45، صائم ایوب نے 22 اور صاحب زادہ فرحان نے 16 رنز بنائے۔

بابر اعظم بغیر کھاتہ کھولے آؤٹ ہوئے جبکہ کپتان سلمان علی آغا صرف ایک رن بنا کر پویلین لوٹ گئے۔

زمبابوبے کے بریڈ ایونز نے 2 جب کہ دیگر 3 باؤلرز نے ایک،ایک وکٹ اپنے نام کی۔

واضح رہے کہ سہ ملکی سیریز میں پاکستان، زمبابوے اور سری لنکا کی ٹیمیں حصہ لے رہی ہیں۔