ایرانی صدر مسعود پزشکیان نے پاک افغان کشیدگی ختم کرانے کے لیے کردار ادا کرنے کی پیشکش کر دی۔
وزیر داخلہ محسن نقوی نے ایرانی صدر مسعود پزشکیان سے ملاقات کی۔ جس میں پاک ایران تعلقات اور دوطرفہ تعاون پر تبادلہ خیال کیا گیا۔ ایرانی صدر مسعود پزشکیان نے پاک افغان کشیدگی ختم کرانے کے لیے برادرانہ کردار ادا کرنے کی پیشکش کر دی۔ وزیر داخلہ محسن نقوی نے وزیر اعظم شہباز شریف کی طرف سے ایرانی صدر کے لیے نیک خواہشات کا پیغام پہنچایا۔
وزیر داخلہ محسن نقوی نے کہا کہ ایران اور پاکستان علاقائی امن اور استحکام کے شراکت دار ہیں۔ ایرانی صدر مسعود پزشکیان نے کہا کہ پاکستان کے ساتھ تعلقات کو خصوصی اہمیت دیتے ہیں۔ اور ایران اپنے بھائی کے بے پایاں تعاون کو فراموش نہیں کر سکتا۔
مسعود پزشکیان نے دو طرفہ تعلقات پر اطمینان کا اظہار کرتے ہوئے کہا کہ دونوں ممالک کے پاس تعاون کو فروغ دینے کے بے پناہ مواقع موجود ہیں۔ دونوں رہنماؤں کے درمیان ملاقات خوشگوار ماحول میں ہوئی۔ جس میں باہمی اعتماد اور دوستی کے رشتوں کو مزید مستحکم بنانے کے عزم کا اعادہ کیا گیا۔
