نیپال میں ماؤنٹ ایورسٹ کے قریب غیر ملکی سیاحوں کو لے جانے والا ہیلی کاپٹر گر کر تباہ ہونے سے کم از کم پانچ افراد ہلاک ہو گئے جبکہ طیارے میں سوار ایک اور شخص تاحال لاپتہ ہے۔
عالمی میڈیا رپورٹس کے مطابق ہیلی کاپٹر میں میکسیکو کے 5 شہری اور ایک نیپالی پائلٹ سوار تھا اور گزشتہ روز لاپتہ ہو گیا تھا۔
رپورٹ کے مطابق ہیلی کاپٹر لاماجورا کے علاقے میں گر کر تباہ ہوا ہے علاقے کے چیف گورنمنٹ ایڈمنسٹریٹر بسنتا بھٹارائی نے کہا کہ امدادی کارکنوں نے پانچ افراد کی لاشیں نکال لی ہیں اور چھٹے شخص کی تلاش کر رہے ہیں۔
طیارہ سیاحوں کو دنیا کی بلند ترین چوٹی کے سیاحتی سفر کے بعد صبح نیپال کے دارالحکومت کھٹمنڈو واپس لا رہا تھا۔
نیپالی حکام نے کہا ہے کہ موسمی حالات نے ہیلی کاپٹر کے پرواز کے راستے میں تبدیلی پر مجبور کیا۔ مون سون کے موسم میں شدید بارشوں کے دوران پروازوں کا تاخیر سے ہونا اور راستے تبدیل ہونا عام بات ہے۔
خیال رہے یہ واقعہ مغربی نیپال میں طیارے کے حادثے کے تقریباً چھ ماہ بعد پیش آیا ہے، جس میں جہاز میں سوار تمام 72 افراد ہلاک ہو گئے تھے۔ ہمالیائی ملک کے پاس دنیا کے کچھ سب سے دور دراز اور مشکل رن وے ہیں، جو برف سے ڈھکی چوٹیوں سے ڈھکے ہوئے ہیں جو کامیاب پائلٹوں کے لیے بھی ایک چیلنج ہیں۔
اس کے علاوہ یورپی یونین نے حفاظتی خدشات کے پیش نظر تمام نیپالی جہازوں کو اپنی فضائی حدود سے روک ہوا ہے۔
