کولوراڈو کے شہر فورٹ کولنز اور اس کے آس پاس کے علاقوں میں حالیہ دنوں میں خرگوشوں سے متعلق کچھ غیر معمولی رپورٹس سامنے آئی ہیں۔
ان رپورٹس میں بتایا گیا ہے کہ خرگوشوں کے منہ اور چہرے کے اطراف میں سیاہ، کانٹے دار قسم کی غیر فطری بڑھوتری دیکھی گئی ہے۔
ماہرین کے مطابق یہ حالت "رابٹ پاپیلوما وائرس" کی وجہ سے پیدا ہوتی ہے، جو خرگوشوں میں عام پایا جانے والا وائرس ہے۔
کولوراڈو، جو امریکہ کے مغربی حصے میں واقع ایک دلکش ریاست ہے، اپنی راکی ماؤنٹینز، قدرتی مناظر اور ہائیکنگ ٹریکس کی وجہ سے سیاحوں میں خاصی مقبول ہے۔
تاہم حالیہ ہفتوں میں فورٹ کولنز کے اطراف اس عجیب بیماری نے ماہرین کو چونکا دیا ہے۔
نیوز ویک کی ایک رپورٹ کے مطابق کولوراڈو پارکس اینڈ وائلڈ لائف کے ترجمان نے وضاحت کی ہے کہ یہ وائرس عام طور پر کیڑوں مثلاً پسو یا ٹِک کے ذریعے پھیلتا ہے۔
اس کے نتیجے میں خرگوش کے سر اور منہ کے گرد کیریٹن سے بنی لمبی اور نوکیلی بڑھوتری ہو جاتی ہے۔
یہ بڑھوتری زیادہ تر خرگوش کے لیے مہلک نہیں ہوتی، البتہ اگر یہ ان کے کھانے یا پانی پینے میں رکاوٹ ڈالے تو مسائل پیدا ہو سکتے ہیں۔
یہ وائرس انسانوں یا دیگر پالتو جانوروں کے لیے نقصان دہ نہیں ہے، تاہم ماہرین نے عوام سے درخواست کی ہے کہ وہ متاثرہ خرگوشوں سے دور رہیں اور انہیں ہاتھ نہ لگائیں۔
سوشل میڈیا پر اس عجیب نمو کو دیکھ کر لوگوں نے اسے ٹی وی سیریز ’دی لاسٹ آف اَس‘ سے متاثرہ خرگوشوں سے جوڑ دیا ہے۔
ایک مقامی رہائشی نے بتایا کہ انھوں نے اپنے صحن میں خرگوش کو اس نمو کے ساتھ دیکھا تھا اور وہ سردیوں میں اس کے مرنے کی توقع کر رہی تھیں، لیکن وہ اگلے سال بھی واپس آیا اور اس کی نمو مزید بڑھ گئی۔
کولوراڈو پارکس اینڈ وائلڈ لائف نے مزید کہا کہ یہ وائرس زیادہ تر گرمیوں کے مہینوں میں کیڑوں کے ذریعے منتقل ہوتا ہے اور سردیوں میں یہ خود بخود ختم ہو جاتا ہے۔
تاہم، پالتو خرگوشوں میں اگر اس وائرس کی علامات ظاہر ہوں، تو فوری طور پر ویٹرنری ڈاکٹر سے رجوع کرنا چاہیے۔
ماہرین نے یہ بھی کہا کہ انسان اس وائرس سے متاثر نہیں ہوتے، لیکن بہتر یہی ہے کہ وہ ان خرگوشوں سے دور رہیں جن کے جسم پر اس قسم کی نمو ہو۔
عوامی احتیاط کے طور پر، وائلڈ لائف کے ماہرین نے لوگوں کو متاثرہ خرگوشوں سے دور رہنے کی ہدایت کی ہے تاکہ کسی بھی قسم کی غیر ضروری پریشانی سے بچا جا سکے۔
