موسم کی تبدیلی کے ساتھ ہی کھانسی، گلے کی خراش اور سوزش کی شکایات میں اضافہ دیکھا جاتا ہے، جو ہر عمر کے افراد کو متاثر کر سکتی ہیں۔ موسم بدلنے کے دوران الرجی، وائرل یا بیکٹیریل انفیکشن کی وجہ سے زیادہ تر افراد کو کھانسی کا سامنا کرنا پڑتا ہے۔
عام طور پر کھانسی ایک قدرتی ردعمل ہے جو گلے میں موجود بلغم، گرد اور دیگر ذرات کو صاف کرنے میں مدد دیتی ہے، مگر مسلسل کھانسی بعض اوقات مختلف امراض کی علامت بھی بن سکتی ہے۔
کئی بار معدے میں تیزابیت یا ایسی دیگر مسائل بھی کھانسی کی وجہ بن جاتے ہیں۔
خوش آئند بات یہ ہے کہ الرجی، نتھنوں کے انفیکشن یا موسمی بیماری کی وجہ سے ہونے والی کھانسی کو آرام سے گھر پر بھی علاج کیا جا سکتا ہے۔
ایسے ہی چند مؤثر طریقے درج ذیل ہیں۔
شہد
گلے کی سوجن کے علاج کے لیے شہد کا استعمال صدیوں سے ہو رہا ہے اور طبی سائنس بھی اسے کھانسی کے لیے مفید قرار دیتی ہے۔
ایک تحقیق میں بتایا گیا کہ مختلف ادویات کے مقابلے میں شہد کے استعمال سے کھانسی سے زیادہ ریلیف مل سکتا ہے۔
کھانسی کی روک تھام کے لیے ایک یا 2 چائے کے چمچ شہد کو لیموں ملے گرم پانی میں مکس کرکے پی لیں۔
شہد سے گلے کی خراش کو آرام ملے گا جبکہ لیموں کے عرق سے گلا صاف ہوگا۔
2 چائے کے چمچ شہد کھانے سے بھی یہ فائدہ ہو سکتا ہے۔
پودینہ
پودینہ بھی کھانسی کی روک تھام کے لیے بہترین ثابت ہو سکتا ہے۔
پودینے میں موجود مینتھول سے کھانسی کی شدت میں کمی آتی ہے۔آپ پودینے کی چائے سے یہ فائدہ حاصل کر سکتے ہیں۔
ادرک
تحقیقی رپورٹس سے ثابت ہوا ہے کہ ادرک میں موجود مرکبات سے سانس کی نالیوں کے مسلز پرسکون ہوتے ہیں۔
کھانسی ہونے پر ادرک کی چائے ایک اچھا انتخاب ہے جس سے گلے کی خراش اور بلغم میں کمی آئے گی۔
ادرک کو ویسے بھی کھا سکتے ہیں مگر بیشتر افراد کو اس کا ذائقہ پسند نہیں آئے گا۔
ہلدی
ہلدی کا استعمال صدیوں سے مختلف امراض کے علاج کے لیے ہو رہا ہے اور یہ کھانسی کے لیے بھی بہترین ہے۔
اس میں موجود اجزا ورم کش ہوتے ہیں جس سے کھانسی کی شدت میں کمی آتی ہے۔
اس مقصد کے لیے ہلدی کو دودھ میں ملائیں یا ہلدی کی چائے سے لطف اندوز ہوں، دونوں مشروبات میں کچھ مقدار میں سیاہ مرچ اور شہد کا اضافہ بھی کرلیں تاکہ کھانسی سے جلد نجات میں مدد ملے۔
گرم مشروبات
گرم چائے یا پانی پینے سے کھانسی کی شدت میں کمی آتی ہے کیونکہ اس سے حلق میں جمع ہونے والے بلغم اور دیگر ذرات کی صفائی ہوتی ہے۔
پانی
اگر کھانسی سے پریشان ہیں تو پانی کی زیادہ مقدار کا استعمال کریں۔
زیادہ پانی پینے سے نہ صرف گلے کی خراش میں کمی آتی ہے بلکہ گلے میں بلغم بھی گاڑھا نہیں ہوتا۔
بھاپ سے مدد لیں
بھاپ میں سانس لینے سے کھانسی کی شدت میں کمی آتی ہے۔
بھاپ لینے سے سانس کی نالیوں کو سکون ملتا ہے جبکہ ان میں نمی بڑھتی ہے جس سے کھانسی کو کنٹرول کرنے میں مدد ملتی ہے۔
غرارے
نمک ملے پانی سے غرارے کرنے سے گلے کی تکلیف میں کمی آتی ہے مگر اس کے ساتھ ساتھ یہ طریقہ کھانسی کے خلاف بھی مفید ثابت ہوتا ہے۔
غرارے کرنے سے گلے میں نمی کی مقدار بڑھتی ہے جس سے بلغم پتلا ہوتا ہے اور ان ذرات کو خارج کرنے میں مدد ملتی ہے جو خراش کا باعث بنتے ہیں۔
کف ڈراپ
گلے کو سکون پہنچانے والی ٹافیاں یا کف ڈراپ سے گلے میں نمی بڑھتی ہے جس سے کھانسی کی شدت میں عارضی کمی آتی ہے۔
کوشش کریں کہ مینتھول فلیور والی ٹافیوں کا استعمال کریں تاکہ سانس کی نالیاں کھل سکیں۔
