پاکستان کی وفاقی حکومت نے ملک میں مؤثر سائبر سیکیورٹی نظام تشکیل دینے کا فیصلہ کر لیا ہے۔ تفصیلات کے مطابق حکومت وفاق کی سطح پر ایک نئی سائبر سیکیورٹی اتھارٹی قائم کرے گی، جو ’اہم قومی انفراسٹرکچر‘ کے لیے سیکیورٹی اقدامات تیار کرے گی اور قومی سطح پر سائبر حفاظتی نظام کے نفاذ میں مرکزی کردار ادا کرے گی۔
وزارتِ آئی ٹی نے سائبر سیکیورٹی ایکٹ کا ابتدائی مسودہ اسٹیک ہولڈرز کو مشاورت کے لیے بھجوا دیا ہے، جس کے تحت حکومت پیکا میں ترامیم بھی تجویز کر رہی ہے۔
مجوزہ ترامیم میں ’ڈیجیٹل رائٹس پروٹیکشن اتھارٹی‘ کے قیام کی تجویز بھی شامل ہے، جو آن لائن مواد کی نگرانی، جعلی خبروں کے پھیلاؤ پر قابو پانے اور سائبر کرائم کی تحقیقات کے لیے ایک خصوصی تحقیقاتی ایجنسی کے قیام کا اختیار رکھے گی۔
یہ اقدام ریاستی اداروں کے خلاف سائبر جرائم پر قابو پانے اور آن لائن مواد پر نگرانی بڑھانے کے ارادے کے طور پر دیکھا جا رہا ہے۔
واضح رہے کہ 2025 کی پہلی تین سہ ماہیوں کے دوران پاکستان میں 53 لاکھ سے زائد سائبر حملے رپورٹ ہوئے ہیں۔
