گلگت بلتستان کی موجودہ حکومت کی پانچ سالہ آئینی مدت مکمل ہو گئی، جس کے بعد تمام وزراء، مشیران اور کوآرڈینیٹرز کو ڈی نوٹیفائی کر دیا گیا ہے۔ نگران حکومت سے متعلق دفعات کے تحت جاری کیا گیا نوٹیفکیشن 24 نومبر 2025 کی رات 12 بجے سے نافذ العمل ہوگا۔ یہ فیصلہ گلگت بلتستان اسمبلی سیکرٹریٹ اور شق 56(5) کے تحت کیا گیا۔
نوٹیفکیشن سیکرٹری قانون و استغاثہ سجاد حیدر کے دستخط کے ساتھ تمام سرکاری محکموں اور انتظامی حکام کو ارسال کر دیا گیا ہے۔
دریں اثنا، نگران وزیر اعلیٰ کی تقرری کے لیے سمری ارسال کر دی گئی ہے اور اعلان متوقع طور پر کل کیا جائے گا۔ نگران وزیر اعلیٰ کی تقرری کے بعد نئی نگران کابینہ کے نام بھی وزیر اعلیٰ کی جانب سے جاری کیے جائیں گے۔ حکومت کی مدت ختم ہونے پر موجودہ کابینہ تحلیل ہو جائے گی اور وزیر اعلیٰ گلبر خان اپنے عہدے سے سبکدوش ہو جائیں گے۔
اپوزیشن کا کہنا ہے کہ قانون کے مطابق نگران سیٹ اپ کی ذمہ داری ہے کہ خطے میں شفاف اور غیر جانبدارانہ انتخابات کو یقینی بنائے۔ اپوزیشن نے مؤقف اختیار کیا کہ عوامی مسائل کے حل کے لیے خاطر خواہ اقدامات نہیں کیے گئے، اس لیے نگران حکومت کا مکمل غیر جانبدار ہونا انتہائی اہم ہے۔
ادھر الیکشن کمیشن نے واضح کیا ہے کہ گلگت بلتستان میں آئندہ انتخابات آئینی شیڈول کے مطابق کرائے جائیں گے۔
