کمپیوٹر ٹیکنالوجی کمپنی ’مائیکرو سافٹ‘ نے اپنی پروفیشنل مائکرو بلاگنگ ویب سائٹ ’لنکڈن‘ کو دنیا کے سب سے بڑے ملک چین میں بند کرنے کا اعلان کردیا۔
خبر رساں ادارے ’ایجنسی پریس فرانس‘ (اے ایف پی) کے مطابق امریکی کمپنی نے اپنی بلاگ پوسٹ میں تصدیق کی کہ رواں برس کے اختتام تک چین میں وہ اپنی سوشل ویب سائٹ بند کردے گی۔
مائیکرو سافٹ کے مطابق چین میں ’لنکڈن‘ کو بند کرکے اس کی جگہ مقامی مائکرو بلاگنگ ویب سائٹ ’ان جابس‘ متعارف کرائی جائے گی۔
کمپنی نے اگرچہ تصدیق کی کہ لنکڈن کو چین میں رواں سال کے اختتام تک بند کردیا جائے، تاہم مائیکرو سافٹ نےاس کی بندش کی حتمی تاریخ کا اعلان نہیں کیا۔
اے ایف پی کے مطابق لنکڈن نے چینی حکومت کی جانب سے سخت قوانین بنائے جانے اور چینی صارفین کے ڈیٹا کی چوری کے الزامات کے بعد مذکورہ فیصلہ کیا۔
تاہم مائیکرو سافٹ نے اپنے بلاگ میں واضح طور پر اس بات کا ذکر نہیں کیا کہ انہوں نے چینی حکومت کی سختیوں کی وجہ سے مذکورہ فیصلہ کیا۔
لنکڈن کے آفیشل بلاگ میں بتایا گیا کہ کمپنی نے 2014 میں ہی چین میں مقامی ورژن کی ویب سائٹ بنانے کا فیصلہ کیا تھا، جس پر رواں برس کے اختتام پر عمل کیا جائے گا۔
یہاں یہ بھی بات یاد رہے کہ چین میں عام سوشل اور مائیکرو بلاگنگ ویب سائٹس جیسا کہ فیس بک، ٹوئٹر، انسٹاگرام، واٹس ایپ اور اسنیپ چیٹ کی جگہ وہاں کی مقامی ویب سائٹس زیادہ مقبول ہیں اور امریکی کمپنیوں پر وہاں سخت پابندیاں عائد ہیں۔
’لنکڈن‘ دنیا بھر میں پروفیشنل افراد کی سب سے بڑی ویب سائٹ تسلیم کی جاتی ہے، جسے لوگ اپنا پروفیشنل نیٹ ورک بڑھانے یا اس پر نوکری کی تلاش کا کام سر انجام دیتے ہیں۔
مائیکرو سافٹ نے ’لنکڈن‘ کو جون 2016 میں 2 ارب ڈالر سے زائد کی رقم میں خریدا تھا۔
