بیجنگ کے ایک انسیکٹ-تھیم والے میوزیم کیفے نے کافی کی دنیا میں ایسا منفرد تجربہ متعارف کرایا ہے جس نے نہ صرف سوشل میڈیا پر ہلچل مچا دی ہے بلکہ صارفین کو بھی حیران کر دیا ہے۔
45 یوآن کی یہ کاکروچ کافی اپنی انوکھی ترکیب کی وجہ سے ہر جگہ موضوعِ بحث بنی ہوئی ہے۔ اس میں گراؤنڈ کاکروچ پاؤڈر اور خشک میل ورمز شامل کیے جاتے ہیں، جو کافی کے اوپر بھی چھڑکے جاتے ہیں۔
ساوتھ چائنا مارننگ پوسٹ کے مطابق یہ ڈرنک چند ماہ قبل متعارف کروائی گئی تھی، لیکن حال ہی میں اس نے سوشل میڈیا پر زور پکڑا۔
ایک ملازم کے مطابق، "چونکہ ہمارا میوزیم کیڑوں پر مبنی ہے، ہم نے سوچا کہ مشروبات بھی اسی تصور کے مطابق تیار کیے جائیں۔"
دلچسپ بات یہ ہے کہ نوجوان صارفین اس تجربے سے لطف اندوز ہوتے ہیں، جبکہ بچے اور ان کے والدین اکثر اسے آزمانے سے گریز کرتے ہیں۔
میوزیم کیفے کے مطابق کافی میں استعمال ہونے والے تمام اجزاء، بشمول کیڑوں کا پاؤڈر، روایتی چینی دواؤں کی دکانوں سے حاصل کیے جاتے ہیں تاکہ معیار اور حفاظت یقینی بنائی جا سکے۔
روایتی طب کے ماہرین کے مطابق کاکروچ پاؤڈر خون کی روانی بہتر کرنے میں مددگار ہو سکتا ہے، جبکہ پروٹین سے بھرپور میل ورمز قوتِ مدافعت بڑھانے میں معاون سمجھے جاتے ہیں۔
کیفے کے مطابق، اس منفرد کافی کے روزانہ تقریباً 10 کپ فروخت ہو رہے ہیں۔
کاکروچ کافی کے ساتھ ساتھ کیفے میں دیگر تجرباتی ڈرنکس بھی پیش کی جا رہی ہیں۔
مثال کے طور پر:
پچر پلانٹ کے رس سے بنائی گئی ایک ڈرنک، جس کا ذائقہ عام کافی جیسا بتایا جاتا ہے۔
ہالووین کے دوران چیونٹیوں سے بنی کافی بھی پیش کی گئی، جسے صارفین نے کھٹا ذائقہ رکھنے والی ڈرنک قرار دیا۔
چین میں غیر روایتی کافی ترکیبوں کا رجحان تیزی سے بڑھ رہا ہے۔ اس سے قبل یُونان کے ایک کیفے نے اپنی کافی میں ڈیپ فرائیڈ ورمز شامل کر کے لوگوں کی توجہ حاصل کی تھی۔
