اکثر افراد سالم پھل کھانا پسند کرتے ہیں جبکہ کچھ ان کے جوس پینے کو ترجیح دیتے ہیں، مگر صحت کے لیے زیادہ مفید کیا ہوتا ہے؟
اس سوال کا جواب ایک نئی تحقیق میں دیا گیا ہے۔
جرنل کرنٹ ڈویلپمنٹس ان نیوٹریشن میں شائع تحقیق میں بتایا گیا کہ جوس کے مقابلے میں سالم پھل کو کھانے سے امراض قلب سے خود کو بچانے میں زیادہ مدد ملتی ہے۔
اس تحقیق میں 3 لاکھ 71 ہزار سے زائد افراد کی غذائی عادات کے ڈیٹا کا تجزیہ کیا گیا تھا۔
ان افراد کی عمر، آمدنی، تعلیم اور تمباکو نوشی سمیت دیگر عناصر کو مدنظر رکھا گیا۔
تحقیق میں دریافت ہوا کہ سالم پھلوں کا کم استعمال کرنے والے افراد میں ہائی بلڈ پریشر، ہائی کولیسٹرول، امراض قلب اور ہارٹ اٹیک کی شرح زیادہ ہوتی ہے۔
تحقیق کے مطابق 100 فیصد خالص پھلوں کے جوس اور امراض قلب کے خطرے میں کمی کے درمیان قابل اعتبار تعلق دریافت نہیں ہوسکا۔
تحقیق میں مزید بتایا گیا کہ 100 فیصد خالص جوس ہارٹ اٹیک کے خطرے میں کسی حد تک کمی لاتا ہے مگر ہائی کولیسٹرول کے حوالے سے کوئی فائدہ دریافت نہیں ہوا۔
محققین نے بتایا کہ اس سے عندیہ ملتا ہے کہ جوس سے صحت کو اتنے فوائد حاصل نہیں ہوتے جتنے سالم پھل کو کھانے سے ہوتے ہیں۔
انہوں نے کہا کہ سالم پھلوں کے زیادہ استعمال سے دل کی شریانوں کی صحت بہتر ہوتی ہے۔
ان کا کہنا تھا کہ سالم پھلوں میں تمام نباتاتی فائبر برقرار رہتا ہے جو جوس بنانے کے عمل میں خارج ہو جاتا ہے جس کی وجہ سے پھل کھانے کے بعد بلڈ شوگر اور انسولین کی سطح میں فوری اضافہ نہیں ہوتا۔
اسی طرح نباتاتی مرکبات کی سطح سالم پھلوں اور جوس میں مختلف ہوتی ہے اور سالم پھل اس حوالے سے زیادہ بہتر ثابت ہوتے ہیں۔
محققین کے مطابق اس تحقیق میں غذائی فائبر یا مرکبات کی مقدار کا براہ راست تجزیہ نہیں کیا گیا تھا۔
انہوں نے کہا کہ ہم یہ نہیں کہتے کہ پھلوں کے 100 فیصد جوسز دل کی صحت کے لیے نقصان دہ ہوتے ہیں مگر سالم پھل کو کھانا زیادہ بہتر ہوتا ہے۔
اب ان کی جانب سے اس تحقیق کو مزید آگے بڑھانے پر کام کیا جا رہا ہے۔
