ہائی بلڈ پریشر یا فشار خون متاثر ہونے میں کئی عوامل شامل ہیں، جن میں صحت کے لیے نقصان دہ غذائیں بھی شامل ہیں۔ یہ مرض اکثر خاموش رہتا ہے اور اس وجہ سے اسے "خاموش قاتل" بھی کہا جاتا ہے، کیونکہ یہ ہارٹ اٹیک اور فالج جیسے جان لیوا امراض کا خطرہ بڑھا سکتا ہے۔
خوش قسمتی سے، چند غذاؤں کے استعمال سے ہائی بلڈ پریشر کے خطرے کو کم کیا جا سکتا ہے۔
سیب
تحقیق سے ثابت ہوا ہے کہ روزانہ ایک سیب کھانے سے ہائی بلڈ پریشر کا خطرہ تقریباً 9 فیصد تک کم ہو سکتا ہے۔
اس میں موجود نباتاتی مرکبات بلڈ پریشر کو کنٹرول کرنے میں مدد دیتے ہیں اور دل کی صحت کے لیے بھی فائدہ مند ہیں۔
ترش پھل
لیموں، گریپ فروٹ اور مالٹے جیسے ترش پھل بلڈ پریشر کو کم رکھنے میں مددگار ثابت ہوتے ہیں۔
یہ پھل وٹامنز، منرلز اور نباتاتی مرکبات سے بھرپور ہوتے ہیں جو دل کی صحت کے لیے ضروری ہیں۔ گریپ فروٹ اور مالٹے کا جوس پینا بھی مفید ہے۔
کیلے
کیلے میں پوٹاشیم کی مقدار زیادہ ہوتی ہے، جو جسم سے اضافی نمکیات خارج کر کے خون کی شریانوں پر دباؤ کم کرتا ہے اور بلڈ پریشر کو صحت مند سطح پر رکھتا ہے۔
کیوی فروٹ
کیوی میں پوٹاشیم، وٹامن سی اور اینٹی آکسائیڈنٹس شامل ہیں، جو بلڈ پریشر کو مستحکم رکھنے میں مدد دیتے ہیں۔
بلیو بیریز
بلیو بیریز کے استعمال سے بھی بلڈ پریشر میں کمی لانے میں مدد مل سکتی ہے۔
اس میں موجود نباتاتی مرکبات اس حوالے سے بہترین ثابت ہوتے ہیں۔
اس پھل سے خون کی شریانوں کے افعال بہتر ہوتے ہیں اور بلڈ پریشر کی سطح میں کمی آتی ہے۔
انار
انار کا جوس پینے سے بھی بلڈ پریشر میں کمی لانے میں مدد ملتی ہے۔
تحقیقی رپورٹس کے مطابق روزانہ ایک کپ انار کا جوس پینے سے بلڈ پریشر میں کمی آتی ہے۔
البتہ انار کے جوس میں چینی کے استعمال سے گریز کرنا چاہیے۔
اخروٹ
ایک تحقیق میں دریافت کیا گیا کہ روزانہ اخروٹ کھانے سے بلڈ پریشر کی سطح میں کمی آتی ہے۔
ماہرین کے مطابق اخروٹ میں موجود اجزا اور اینٹی آکسائیڈنٹس جسم میں خون کے بہاؤ کو بہتر بناتے ہیں۔
پستے
اس گری میں موجود اینٹی آکسائیڈنٹس سے بلڈ کولیسٹرول کی سطح کم ہوتی ہے جبکہ بلڈ پریشر مستحکم ہوتا ہے، جس سے امراض قلب کا خطرہ کم ہوتا ہے۔
تحقیقی رپورٹس میں دریافت کیا گیا کہ بلڈ پریشر کی سطح میں کمی لانے کے لیے پستے دیگر گریوں کے مقابلے میں زیادہ مددگار ثابت ہوتے ہیں۔
بادام
باداموں میں اینٹی آکسائیڈنٹس، صحت کے لیے مفید چکنائی، فائبر، پوٹاشیم اور میگنیشم جیسے اجزا موجود ہوتے ہیں۔
یہ سب اجزا بلڈ پریشر میں کمی لانے میں مدد فراہم کرتے ہیں۔
تحقیقی رپورٹس کے مطابق 6 ہفتوں تک روزانہ کچھ بادام کھانے سے بلڈ پریشر کی سطح مستحکم ہوتی ہے۔
مچھلی
بلڈ پریشر کو کنٹرول میں رکھنے کے لیے اومیگا 3 فیٹی ایسڈز اہم ہوتے ہیں۔
یہ فیٹی ایسڈز مچھلی کے گوشت میں زیاہ مقدار میں موجود ہوتے ہیں۔
ہر ہفتے 2 بار مچھلی کھانے کی عادت سے امراض قلب بشمول ہائی بلڈ پریشر سے متاثر ہونے کا خطرہ کم ہوتا ہے۔
سبز پتوں والی سبزیاں
پالک یا ایسی ہی دیگر سبزیوں میں نائٹریٹ کی مقدار کافی زیادہ ہوتی ہے جس سے بلڈ پریشر کی سطح صحت مند رکھنے میں مدد ملتی ہے۔
تحقیقی رپورٹس کے مطابق روزنہ ایک کپ سبز پتوں والی سبزیاں کھانے سے بلڈ پریشر کی سطح کم کی جاسکتی ہے جبکہ امراض قلب کا خطرہ بھی کم ہوجاتا ہے۔
چقندر
چقندر کے جوس کو پینے سے بھی مختصر اور طویل المعیاد بنیادوں پر بلڈ پریشر کی سطح میں کمی آسکتی ہے کیونکہ اس سبزی میں نائٹریٹ موجود ہوتا ہے۔
ایک تحقیق میں دریافت کیا گیا کہ 4 ہفتے تک روزانہ ایک کپ چقندر کا جوس پینے سے بلڈ پریشر کی سطح میں نمایاں کمی آتی ہے۔
گاجر
گاجروں میں ایسے نباتاتی مرکبات کی مقدار بہت زیادہ ہوتی ہے جو جسم کے مختلف افعال جیسے بلڈ پریشر کو کنٹرول میں رکھنے کے لیے ضروری ہوتے ہیں۔
2023 کی ایک تحقیق میں دریافت کیا گیا کہ 100 گرام گاجر کھانا عادت بنانے سے ہائی بلڈ پریشر کا خطرہ 10 فیصد تک کم ہو جاتا ہے۔
لہسن
لہسن کا استعمال خون کے بہاؤ کو بہتر بناکر بلڈ پریشر میں کمی لانے میں مدد فراہم کرتا ہے۔
ایک تحقیق میں دریافت کیا گیا کہ لہسن کے استعمال سے بلڈ پریشر کی سطح، شریانوں کی اکڑن اور کولیسٹرول کی سطح میں کمی آتی ہے۔
ادرک
ایسے شواہد موجود ہیں جن سے عندیہ ملتا ہے کہ ادرک کے سپلیمنٹس سے بلڈ پریشر کو کنٹرول میں رکھنے میں مدد ملتی ہے۔
تحقیقی رپورٹس کے مطابق 3 گرام ادرک کے سپلیمنٹ کے استعمال سے بلڈ پریشر کی سطح میں نمایاں بہتری آتی ہے۔
پھلیاں
پھلیاں جیسے مٹر، بیج اور دالوں وغیرہ کے استعمال سے بھی بلڈ پریشر کی سطح میں کمی آتی ہے۔
تحقیقی رپورٹس کے مطابق پھلیوں کے استعمال سے جسم میں نائٹرک آکسائیڈ کی سطح بڑھتی ہے جس سے بلڈ پریشر میں کمی آتی ہے۔
ٹماٹر
ٹماٹر میں پوٹاشیم اور لائیکوپین جیسے اجزا موجود ہوتے ہیں۔
لائیکو پین دل کی صحت کے لیے بہت زیادہ مفید غذائی جز ہے اور بلڈ پریشر کو کنٹرول میں رکھتا ہے۔
تحقیقی رپورٹس کے مطابق ٹماٹر کھانے سے بلڈ پریشر کو مستحکم رکھنے میں مدد ملتی ہے جس سے امراض قلب کا خطرہ کم ہوتا ہے۔
جو کا دلیہ
متعدد تحقیقی رپورٹس میں بتایا گیا کہ جو کا دلیہ کولیسٹرول کی سطح بہتر بناتا ہے اور جسمانی وزن میں کمی لاتا ہے۔
اسی طرح یہ دلیہ بلڈ پریشر کو کنٹرول میں رکھنے میں مدد فراہم کرسکتا ہے۔
تحقیقی رپورٹس کے مطابق اس کے استعمال سے بلڈ پریشر کی سطح میں نمایاں کمی آتی ہے۔
