کھجوریں سارا سال آسانی سے دستیاب ہوتی ہیں اور اس کی متعدد اقسام موجود ہیں۔ یہ تازہ اور خشک دونوں شکلوں میں ملتی ہیں، لیکن زیادہ تر لوگ خشک کھجوریں استعمال کرتے ہیں۔
کھجوروں میں قدرتی شکر موجود ہوتی ہے، جس کی وجہ سے خشک ہونے پر یہ مزید میٹھی ہو جاتی ہیں۔
تاہم، میٹھا ہونا یہ مطلب نہیں کہ یہ آپ کے لیے نقصان دہ ہیں۔ حقیقت میں، کھجوریں ایسے غذائی اجزاء فراہم کرتی ہیں جو جسم کے لیے ضروری ہیں۔
100 گرام کھجور میں جسم کو کاپر، میگنیشیم، مینگنیز، پوٹاشیم، وٹامن B6، فائبر اور آئرن سمیت متعدد اہم غذائی اجزاء حاصل ہوتے ہیں۔
امریکا کے کلیو لینڈ کلینک کے مطابق، کھجوریں کھانے سے صحت پر متعدد مثبت اثرات مرتب ہوتے ہیں، جن میں چھ اہم فوائد شامل ہیں۔
معدے کی صحت بہتر ہوتی ہے
تحقیقی رپورٹس میں فائبر سے صحت کو ہونے والے فوائد کو ثابت کیا گیا ہے۔
اس پھل کو کھانے نظام ہاضمہ کو فائدہ ہوتا ہے، قبض سے بچنے میں مدد ملتی ہے جبکہ آنتوں کے افعال بہتر ہوتے ہیں جس سے آنتوں کے کینسر کا خطرہ گھٹ جاتا ہے۔
دائمی امراض سے تحفظ
کھجوروں میں ایسے نباتاتی مرکبات موجود ہوتے ہیں جو جسم میں اینٹی آکسائیڈنٹس کا کام کرتے ہیں۔
اینٹی آکسائیڈنٹس ہمارے جسم کے اندر خلیات کو مضر مواد سے تحفظ فراہم کرتے ہیں۔
تحقیقی رپورٹس کے مطابق اینٹی آکسائیڈنٹس سے آٹو امیون امراض، کینسر، امراض قلب اور دیگر سے متاثرہونے کا خطرہ گھٹ جاتا ہے۔
دماغی صحت کے لیے مفید
تحقیقی رپورٹس میں کھجوروں کو دماغی افعال کے لیے بہترین قرار دیا گیا ہے۔
اینٹی آکسائیڈنٹس سے بھرپور ہونے کی وجہ سے اس پھل سے دماغی ورم گھٹ جاتا ہے جس سے مختلف امراض سے تحفظ ملتا ہے۔
چوہوں پر ہونے والی ایک تحقیق میں دریافت کیا گیا کہ کھجوریں کھانے سے انزائٹی سے بچنے میں مدد ملتی ہے، یادداشت بہتر ہوتی ہے جبکہ دماغ کے لیے کچھ نیا سیکھنا آسان ہو جاتا ہے۔
جِلد کو جوان رکھنا ممکن
نباتاتی مرکبات عمر کے اضافے سے جِلد پر مرتب ہونے والے اثرات کی روک تھام کرتے ہیں۔
کھجوروں میں موجود نباتاتی مرکبات اس حوالے سے بہتر ہوتے ہیں۔
ان مرکبات سے جھریوں کو ابھرنے سے روکنے یا ان کے حجم میں کمی لانے میں مدد مل سکتی ہے۔
چینی کا صحت مند متبادل
چینی کا استعمال کم کرنا چاہتے ہیں تو کھجوریں اس کا بہترین متبادل ثابت ہوسکتی ہیں۔
چینی کے کم استعمال کا مطلب یہ ہے کہ ہائی بلڈ شوگر اور ذیابیطس ٹائپ 2 سے بچنا آسان ہو جاتا ہے۔
البتہ بہت زیادہ کھانے سے گریز کرنا چاہیے کیونکہ اس پھل میں کیلوریز کی مقدار کافی زیادہ ہوتی ہے۔
ہڈیوں کی صحت بہتر ہو سکتی ہے
کھجوریں فاسفورس، کیلشیئم اور میگنیشم سمیت متعدد منرلز سے لیس ہوتی ہیں اور یہ سب عمر بڑھنے کے ساتھ ہڈیوں میں آنے والی کمزوری کی روک تھام کے لیے اہم ہیں۔
