امریکی صدر ڈونلڈ ٹرمپ نے پنسلوانیا میں ایک اہم تقریب سے خطاب کرتے ہوئے کہا کہ ’’ٹیرف اب میرا پسندیدہ لفظ بن چکا ہے، کیونکہ انہی ٹیرف کے ذریعے ملک میں اربوں ڈالر آرہے ہیں۔‘‘ ان کے مطابق حکومت نے ان رقوم میں سے امریکی کسانوں کو 12 ارب ڈالر کی امداد بھی فراہم کی۔
تقریب کے دوران ٹرمپ نے معاشی ترقی، سرمایہ کاری، بیرونی پالیسی اور بارڈر سیکیورٹی سے متعلق کئی بڑے دعوے کیے۔ ان کا کہنا تھا کہ ایک انرجی کمپنی پنسلوانیا میں 10 ارب ڈالر کی سرمایہ کاری کرنے والی ہے، جسے وہ امریکی معیشت کے لیے نہایت مثبت پیش رفت قرار دیتے ہیں۔
اپنے خطاب میں ٹرمپ نے دعویٰ کیا کہ سعودی عرب، قطر اور متحدہ عرب امارات نے امریکہ میں 4 ٹریلین ڈالر کی سرمایہ کاری کا اعلان کیا ہے۔ مزید کہا کہ ان ممالک کے سربراہان کے مطابق امریکہ صرف ایک سال میں دوبارہ طاقتور ریاست کے طور پر ابھرا ہے۔
معاشی صورتحال پر بات کرتے ہوئے ٹرمپ کا کہنا تھا کہ ملک میں تیل کی قیمت دو ڈالر فی گیلن سے بھی کم ہو چکی ہے اور ان کی کوششوں سے محنت کش طبقے کی آمدن دوگنی ہوگئی ہے۔
ٹرمپ نے اپنے خطاب میں سابق صدر جو بائیڈن پر بھی شدید تنقید کی اور کہا کہ بائیڈن کی حکومت ورکنگ کلاس کے مفادات کے خلاف تھی، جبکہ ان کے دور میں لگ بھگ ڈھائی کروڑ افراد غیر قانونی طور پر امریکہ میں داخل ہوئے۔
صدر ٹرمپ نے بارڈر سیکیورٹی پر زور دیتے ہوئے کہا کہ دنیا کی سخت ترین سرحد شمالی کوریا کی ہے جبکہ امریکی تاریخ میں پہلی بار ریورس مائیگریشن ہورہی ہے۔
عالمی امن کے حوالے سے ٹرمپ نے کہا کہ ان کی حکومت دنیا میں امن کے لیے سرگرم ہے۔ انہوں نے دعویٰ کیا کہ پاکستان اور بھارت کے درمیان جنگ بندی کروانے کے علاوہ انہوں نے تھائی لینڈ اور کمبوڈیا کے درمیان بھی کشیدگی کا خاتمہ کروایا۔
