میانمار میں فوجی حکومت کی مخالفین پر فضائی حملے سے ہلاک ہونے والوں کی تعداد 100 ہوگئی۔
عالمی میڈیا رپورٹس کے مطابق میانمار کے شمال مغربی علاقے ساگانگ میں منگل کو فوج نے فضائی حملے کیے جس میں سانگ گانگ کے گاؤں بالو کو نشانہ بنایا گیا۔
میانمار کی قومی اتحادی حکومت کا کہنا ہےکہ بالو گاؤں کو نشانہ اس وقت بنایا گیا جب شہریوں کی بڑی تعداد علاقے میں نئے ٹاؤن آفس کے افتتاح کے موقع پر موجود تھی۔
حکومتی حکام کا کہنا ہےکہ فضائی حملے میں خواتین اور بچے بھی مارے گئے جب کہ مرنے والوں میں بعض حاملہ خواتین بھی شامل ہیں۔
قومی اتحادی حکومت نے اس فضائی حملے کو جنگی جرم اور گھناؤنا فعل قرار دیا ہے۔
دوسری جانب میانمار کے عسکری حکام نے اس حملے سے متعلق کسی بھی قسم کے تبصرے سے گریز کیا ہے۔
میڈیا رپورٹس کے مطابق فروری 2021 میں فوج کے اقتدار پر قبضے کے بعد سے میانمار میں ہزاروں افراد ہلاک ہو چکے ہیں۔
