بھارت میں روس کے شہر ماسکو سے آنے والی پرواز میں دھماکہ خیز مواد کی اطلاع پر کھلبلی مچ گئی۔
بھارتی میڈیا کے مطابق روس کی فضائی کمپنی ازور ایئر کی پرواز ماسکو سے بھارت کے شہر گوا جارہی تھی۔
طیارے میں عملے کے ارکان سمیت 244 افراد سفر کررہے تھے۔ لینڈنگ سے کچھ وقت پہلے گوا ایئر ٹریفک کنٹرول (اے ٹی سی) کو طیارے میں بم کی موجودگی کی اطلاع دی گئی۔
اطلاع کی بنیاد پر پرواز کو فوری طور پر بھارتی ریاست گجرات کی جانب موڑ دیا گیا ، جہاں طیارے کی ایمرجنسی لینڈنگ کرائی گئی۔
رپورٹ کے مطابق راجکوٹ، جام نگر رینج کے انسپکٹر جنرل آف پولیس اشوک کمار یادو کے مطابق تمام 236 مسافروں اور عملے کے 8 ارکان کو طیارے سے بحفاظت نکال لیا گیا ہے۔
اشوک کمار یادو نے کہا کہ طیارے کی تلاشی کے دوران کسی قسم کا کوئی مشتبہ مواد نہیں ملا پولیس اور بم ڈسپوزل اسکواڈ کے ساتھ ساتھ مقامی حکام معاملے کی تحقیقات کر رہے ہیں۔
