محکمہ موسمیات نے خبردار کیا ہے کہ بلوچستان کے خشک سالی سے متاثرہ علاقوں میں دسمبر کے دوران گرج چمک کے ساتھ شدید بارشیں متوقع ہیں۔ محکمہ موسمیات کے مطابق مغربی ہواؤں کا طاقتور سلسلہ 6 سے 10 دسمبر کے دوران صوبے میں داخل ہوگا اور یہ سلسلہ وقفے وقفے سے پورے مہینے جاری رہنے کی پیشگوئی کی گئی ہے۔
بارشوں سے ژوب، شیرانی، موسیٰ خیل، بارکھان، کوہلو، سبی، لسبیلہ، آواران، کیچ، گوادر، پنجگور، خضدار، قلعہ سیف اللہ، چاغی، نوشکی، واشک اور مستونگ سمیت بیشتر اضلاع میں خشک سالی کا خاتمہ ہونے کی توقع ہے۔
محکمہ موسمیات کا کہنا ہے کہ بعض مقامات پر گرج چمک کے ساتھ موسلا دھار بارشیں جبکہ بالائی علاقوں میں برف باری متوقع ہے۔
ماہرین کے مطابق اس سال شمال مغربی ہوائیں معمول سے زیادہ فعال ہیں اور عرب سمندر سے آنے والی نمی بلوچستان کی جانب بڑھ رہی ہے، جس کی وجہ سے بارشوں کا سلسلہ طویل ہوگا۔
محکمہ موسمیات نے مزید بتایا کہ آج ملک کے بیشتر علاقوں میں موسم سرد اور خشک جبکہ پہاڑی علاقوں میں صبح اور رات کے اوقات میں شدید سردی رہنے کا امکان ہے۔
پنجاب اور خیبر پختونخوا کے میدانی علاقوں میں صبح اور رات کے اوقات میں چند مقامات پر ہلکی سے درمیانی دھند پڑنے کا امکان ہے۔
گزشتہ چوبیس گھنٹوں کے دوران ملک کے بیشتر علاقوں میں موسم خشک اور پہاڑی علاقوں میں شدید سرد رہا تاہم پنجاب کے چند میدانی اضلاع میں ہلکی دھند چھائی رہی۔
