اوپنر فخر زمان نیشنل کرکٹ اکیڈمی لاہور میں اپنی ری ہیب کے مراحل سے گزر رہے ہیں۔
ویسٹ انڈیز کے خلاف ٹی ٹوئنٹی سیریز کے دوران ہیمسٹرنگ انجری کا شکار ہونے والے فخر زمان پی سی بی میڈیکل پینل کی تجویز کردہ مشقوں پر عمل کرتے ہوئے جلد صحت یابی کی کوشش کر رہے ہیں۔
ذرائع کے مطابق ان کی انجری خطرناک نوعیت کی نہیں اور وہ ری ہیب مکمل کرکے چند روز میں مکمل فٹنس حاصل کرسکتے ہیں۔
دوسری جانب سلیکشن کمیٹی ارکان کی ٹرائنگولر سیریز کے ممکنہ اسکواڈ پر ابتدائی مشاورت ہوچکی ہے۔
سلیکٹرز فخر زمان کی دستیابی کے لیے پُرامید ہیں ، کپتان سلمان علی آغا کی ہیڈ کوچ مائیک ہیسن سے باضابطہ میٹنگ ہونا ابھی باقی ہے۔
اس کے بعد ٹرائنگولر سیریز اور ایشیا کپ کے اسکواڈ کو حتمی شکل دی جائے گی، اعلان منگل یا بدھ کو متوقع ہے، نوجوان فاسٹ بولر سلمان مرزا کی شمولیت یقینی ہو گئی۔
