ٹوکیو میں ایک باکسنگ ایونٹ کے دوران سر پر چوٹ لگنے سے 2 جاپانی باکسرز انتقال کر گئے۔ 28 سالہ ہیروماسا اوراکاوا کو 2 اگست کو یو جی سائٹو کے خلاف مقابلے کے آٹھویں راؤنڈ میں ناک آؤٹ شکست ہوئی تھی۔
جس کے بعد انہیں سر پر چوٹ لگنے کے باعث اسپتال منتقل کیا گیا تھا، تاہم وہ ہفتے کو انتقال کر گئے۔
اس سے ایک دن پہلے جمعے کو 28 سالہ شیگیتوشی کوٹاری بھی سر پر چوٹ کی وجہ سے چل بسے تھے۔ انہیں بھی 2 اگست کو مقابلے کے بعد سر پر چوٹ آئی تھی۔
دونوں باکسرز کو مقابلے کے بعد اسپتال منتقل کیا گیا جہاں ان کے دماغ میں خون جمنے کا علاج کرنے کے لیے فوری آپریشن کیا گیا، مگر وہ زندگی کی بازی نہ جیت سکے۔
ورلڈ باکسنگ آرگنائزیشن نے دونوں باکسرز کے انتقال پر افسوس کا اظہار کیا ہے۔
واقعے کے بعد جاپان باکسنگ کمیشن نے اعلان کیا ہے کہ اب تمام اورینٹل اینڈ پیسفک باکسنگ فیڈریشن ٹائٹل فائٹس 12 کے بجائے 10 راؤنڈز پر مشتمل ہوں گی۔
جاپانی میڈیا کے مطابق کمیشن نے واقعے کی تحقیقات شروع کر دی ہیں اور ستمبر میں ایک خصوصی اجلاس بلایا جائے گا تاکہ ان اموات پر مزید غور کیا جا سکے۔
