پاکستانی نژاد برطانوی باکسر عامر خان نے کہا ہے کہ باکسنگ میں پاکستان کا مستقبل روشن ہے اور ایک دن پاکستان سے بھی محمد علی یا مائیک ٹائسن جیسا عالمی چیمپئن پیدا ہوگا۔ لاہور کے جناح اسپورٹس کمپلیکس میں منعقدہ انٹرنیشنل باکسنگ چیمپئن شپ میں برطانوی باکسر جیمز میٹکالف نے ڈبلیو بی اے ایشیا گولڈ مڈل ویٹ ٹائٹل اپنے نام کیا۔
جیمز میٹکالف نے ڈومینیکن ریپبلک کے جولیو ڈی جیسس کو تیسرے راؤنڈ میں ناک آؤٹ کیا۔
اسی ایونٹ میں ارجنٹائن کے باکسر البرٹو پلمیٹا نے ڈبلیو بی اے ایشیا ساؤتھ ویلٹر ویٹ ٹائٹل حاصل کیا، انہوں نے فلپائنی باکسر جوفر منٹانو کو چھٹے راؤنڈ میں ناک آؤٹ کیا۔
میڈیا سے گفتگو کرتے ہوئے عامر خان نے کہا کہ لاہور آکر خوشی ہوئی، اس ایونٹ میں 15 ممالک کے باکسرز نے حصہ لیا، فینز اور سیکیورٹی کا معیار بہترین تھا۔
عامر خان نے مزید کہا کہ اس چیمپئن شپ سے پاکستان میں کھیلوں کو فروغ ملے گا، میزبانی شاندار تھی اور یہ ایونٹ پاکستان کے لیے ٹورزم کے فروغ میں بھی مددگار ثابت ہوگا۔
سابق ورلڈ چیمپئن کا کہنا تھا پاکستان میں انتہائی ٹیلنٹڈ باکسرز ہیں، باکسنگ میں پاکستان کا مستقبل روشن ہے، ایک دن پاکستان کا بھی محمد علی اور مائیک ٹائسن جیسا چیمپئن آئےگا۔
عامر خان کا کہنا تھا یہاں ہم نے جو مقابلے دیکھے وہ شاندار تھے، پاکستان آرمی کا بےحد شکر گزار ہوں کہ اتنا اچھا ایونٹ منعقد کیا، پاکستان آرمی نے تمام غیر ملکی باکسرز اور مہمانوں کو بہترین سکیورٹی فراہم کی۔
