بالآخر 10 سال بعد ڈاکٹرعمران فاروق قتل کیس کا فیصلہ سنادیا، تینوں ملزمان کو عمر قید کی سزا

عمران فاروق قتل کیس کے تینوں مجرموں کو عمر قید کی سزا سنادی گئی فائل فوٹو عمران فاروق قتل کیس کے تینوں مجرموں کو عمر قید کی سزا سنادی گئی

ایم کیو ایم رہنما ڈاکٹر عمران فاروق قتل کیس میں تینوں ملزمان کو عمر قید کی سزا سنا دی گئی، عدالت نے قتل کی سازش، معاونت اور سہولت کاری کیس پر فیصلہ دیا۔

اسلام آباد کی انسداد دہشت گردی عدالت نے 10 سال بعد ڈاکٹرعمران فاروق قتل کیس کا فیصلہ سنادیا، عدالت نے تینوں ملزمان معظم علی، محسن علی، خالدشمیم کو عمرقید کی سزا سنا دی اور کہا تینوں ملزمان عمران فاروق کے ورثا کو 10، 10 لاکھ روپے ادا کریں گے۔

ملزم معظم علی، محسن علی، خالدشمیم نے وڈیولنک پر اڈیالہ جیل سے مقدمے کا فیصلہ سنا اور انسداد دہشت گردی عدالت کے جج شاہ رخ ارجمند نے فیصلہ سنایا عدالت نے قتل کی سازش،معاونت اور سہولت کاری کیس پر فیصلہ دیا۔

عدالت نے بانی متحدہ اور افتخار حسین، اشتہاری ملزمان محمد انور اور کاشف کامران کے دائمی وارنٹ گرفتاری جاری کردیئے۔

گزشتہ سماعت میں وکلا کے دلائل مکمل ہونے پر جج شارخ ارجمند نے فیصلہ محفوظ کیا تھا، دوران سماعت پراسیکوٹر نے کہا تھا اشتہاری ملزمان بانی متحدہ ،انور حسین کیخلاف ٹھوس شواہد ہیں، ملزمان کا تعلق بھی ایم کیو ایم سے تھا، ملزمان جرم کے مرتکب ہوئے،قانون کے مطابق سزادی جائے۔

ایف آئی اے پراسیکیوٹر خواجہ امتیاز احمد کا دلائل دیتے ہوئے کہا تھا کہ قانون کے مطابق پاکستان میں کیس چلانے کی اجازت ہے، برطانوی حکومت کو شواہد میں صرف سزائے موت پر اعتراض تھا،برطانوی حکومت کو یقین دلایا گیا کہ ملزمان کو سزائے موت نہیں دی جائے گی۔

یاد رہے ایم کیو ایم کے رہنما عمران فاروق قتل کیس میں اعترافی بیان ریکارڈ کرانے والے خالد شمیم اورمحسن علی بیان سے مکر گئے تھے، دونوں گرفتار ملزمان نے 5سال قبل مجسٹریٹ کواعترافی بیانات ریکارڈ کرائے تھے۔

خیال رہے ایم کیو ایم کے رہنما ڈاکٹر عمران فاروق قتل کیس میں عمران فاروق کا پوسٹ مارٹم کرنے والے ڈاکٹر نے اپنا بیان ریکارڈ کرایا تھا ، جس میں کہا تھا کہ عمران فاروق کی موت چہرے اور سر پر زخموں کے باعث ہوئی۔

اس سے قبل ڈاکٹر عمران فاروق کی اہلیہ شمائلہ فاروق نے اپنے بیان میں انکشاف کیا تھا کہ میری اپنے شوہر کے قاتلوں سے ملاقات ہوئی تھی، انہوں نے خود کو عمران فاروق کے چاہنے والے بتایا۔

واضح رہے ڈاکٹر عمران فاروق 16 ستمبر 2010 کو لندن میں اپنے دفتر سے گھر جارہے تھے کہ انہیں گرین لین کے قریب واقع ان کے گھر کے باہر چاقو اور اینٹوں سے حملہ کرکے قتل کردیا گیا تھا، حملے کے نتیجے میں وہ موقع پر ہی جاں بحق ہو گئے تھے۔

برطانوی پولیس نے دسمبر 2012 میں اس کیس کی تحقیق و تفتیش کے لیے ایم کیو ایم کے قائد کے گھر اور لندن آفس پر بھی چھاپے مارے گئے تھے، چھاپے کے دوران وہاں سے 5 لاکھ سے زائد پاونڈ کی رقم ملنے پر منی لانڈرنگ کی تحقیقات شروع ہوئی تھی۔

بعد ازاں ایف آئی اے نے 2015ءمیں عمران فاروق کے قتل میں مبینہ طور پر ملوث ہونے کے شبہ میں بانی متحدہ اور ایم کیو ایم کے دیگر سینئر رہنماوں کے خلاف مقدمہ درج کیا تھا اور اسی سال محسن علی سید، معظم خان اور خالد شمیم کو بھی قتل میں ملوث ہونے کے الزام میں گرفتار کرلیا گیا تھا۔

install suchtv android app on google app store