پاکستان پیپلز پارٹی (پی پی پی) کے سینئر رہنما شرجیل میمن نے کہا ہے کہ ملک بھر میں بلدیاتی اداروں کو سب سے زیادہ بااختیار پیپلز پارٹی نے بنایا ہے۔ انہوں نے ایم کیو ایم کے رہنما حیدر عباس رضوی کے بیان پر ردعمل دیتے ہوئے کہا کہ اگر ایم کیو ایم زیادہ شور مچاتی ہے تو ہم لاہور کے مقامی حکومتوں کے نظام کو کراچی میں لانے کے لیے تیار ہیں۔
شرجیل میمن نے پنجاب کی مثال دیتے ہوئے کہا کہ وہاں ابھی تک بلدیاتی انتخابات نہیں ہوئے، جبکہ سندھ میں پیپلز پارٹی کی حکومت شہری ترقی اور بنیادی سہولیات پر بھرپور کام کر رہی ہے۔
انہوں نے کہا کہ کراچی سندھ کا دل ہے اور ہماری اولین ترجیحات میں شامل ہے۔ اربوں روپے کی سرمایہ کاری شہری انفراسٹرکچر اور بنیادی سہولیات میں کی جا رہی ہے۔
انہوں نے مزید کہا کہ سندھ حکومت کراچی میں شہری سہولیات اور بنیادی ڈھانچے کی ترقی پر بھرپور کام کر رہی ہے اور رکاوٹ ڈالنے کی کوششیں ناکام رہیں گی۔
شرجیل میمن نے ایم کیو ایم کے سیاسی رویے پر بھی تنقید کی اور کہا کہ کراچی جیسے کثیر الثقافتی شہر میں ہم آہنگی اور سماجی ترقی کو ایم کیو ایم کے رویے نے نقصان پہنچایا ہے۔
انہوں نے مزید کہا: “اگر ایم کیو ایم شہری سہولتوں، بنیادی انفراسٹرکچر، تعلیم، صحت اور پانی و نکاسی کے نظام کی بہتری پر توجہ دیتی تو آج ہم پر انگلیاں نہیں اٹھائی جاتیں۔”
انہوں نے کہا کہ ہمارا کام بولتا ہے، کراچی میں اربوں روپے کے منصوبے جاری ہیں، ایم کیو ایم ان میں رکاوٹ ڈالنے کے لئے سرگرم ہے۔
ای وی بس سروس، پیپلز بس سروس، پنک بس سروس، شاہراہ بھٹو، تاج حیدر پل، پنک اسکوٹیز، بی آر ٹیز جیسے منصوبے ایم کیو ایم بھی شروع کر سکتی تھی لیکن ان کی نیت ہی نہیں تھی۔
