پنجاب حکومت نے صوبے بھر میں شادیوں اور تقریبات میں ون ڈش پابندی کی خلاف ورزی اور لاؤڈ سپیکر کے غیر ضروری استعمال کے خلاف وسیع پیمانے پر کریک ڈاؤن کا فیصلہ کر لیا ہے۔ وزیراعلیٰ مریم نواز شریف نے تمام کمشنرز اور ڈپٹی کمشنرز کو ہدایات جاری کرتے ہوئے کہا کہ شادیوں اور دیگر تقریبات میں ون ڈش پابندی ہر صورت یقینی بنائی جائے۔
وزیراعلیٰ نے شادی ہالز، فارم ہاؤسز اور اوپن ایریاز میں بلند آواز میوزک چلانے اور لاؤڈ سپیکر کے غیر قانونی استعمال کے خلاف سخت کارروائی کی ہدایت کی ہے۔
ان کے احکامات کے مطابق قوالی نائٹس اور کسی بھی تقریب میں غیر قانونی لاؤڈ سپیکر استعمال کرنے والوں کے خلاف فوری قانونی چارہ جوئی کی جائے گی۔
حکام کا کہنا ہے کہ فارم ہاؤسز اور گراؤنڈز میں بھی شادی ہالز کی طرح لاؤڈ سپیکر پر پابندی اور ون ڈش پالیسی پر عملدرآمد لازمی ہوگا۔
اس کے ساتھ ہی شادی ہالز کے مقررہ اوقات کار کی سخت مانیٹرنگ کی جائے گی، اور ون ڈش یا لاؤڈ سپیکر کی خلاف ورزی کرنے والی تقریبات میں سرکاری افسران کو شرکت کی اجازت نہیں دی جائے گی۔
حکومت کا مقصد صوبے میں شور کی آلودگی اور فضول خرچی کو کم کرنا اور شادی تقریبات میں نظم و ضبط کو یقینی بنانا ہے۔
