پاکستان کی معروف اداکارہ آمنہ شیخ نے حال ہی میں ایک انٹرویو کے دوران لڑکیوں کو شادی سے قبل اہم مشورے دیے، جنہیں مداحوں نے خاصا سراہا۔ انٹرویو میں گفتگو کرتے ہوئے آمنہ شیخ نے کہا کہ شادی زندگی کا نہایت اہم فیصلہ ہے، اس لیے لڑکیوں کو اپنے مستقبل کے شریکِ حیات کے بارے میں چند بنیادی باتوں پر ضرور غور کرنا چاہیے۔
اداکارہ کے مطابق، سب سے پہلے ایک لڑکی کو یہ سمجھنا چاہیے کہ شادی کے بعد وہ معاشی طور پر خود کو کس طرح مضبوط رکھ سکتی ہے۔
ان کا کہنا تھا کہ “خود مختاری بہت اہم ہے، اس لیے لڑکی کا خود بھی مالی طور پر مستحکم ہونا ضروری ہے۔”
انہوں نے مزید کہا کہ دوسری اہم بات یہ ہے کہ لڑکے کا اپنی ماں، باپ اور قریبی عزیزوں سے رویہ دیکھا جائے، کیونکہ “جو انسان اپنے والدین سے جیسا سلوک کرتا ہے، وہی رویہ وقت کے ساتھ اپنی بیوی کے ساتھ بھی اختیار کرتا ہے۔”
آمنہ شیخ نے یہ بھی کہا کہ ایک لڑکے کا تعلیم یافتہ اور سمجھدار ہونا لازمی ہے، جبکہ لڑکیوں کو شریکِ حیات کے انتخاب میں اپنے طرزِ زندگی اور سوچ کو بھی مدِنظر رکھنا چاہیے تاکہ ازدواجی زندگی متوازن رہ سکے۔
خیال رہے کہ اداکارہ آمنہ شیخ اور اداکار محب مرزا کی اکتوبر 2019 میں شادی کے 14 سال بعد طلاق ہوگئی تھی، دونوں ستارے 2005 میں رشتہ ازدواج میں بندھے تھے اور دونوں کی ایک بیٹی میسا بھی ہے۔
اداکارہ نے 2020 میں عمر فاروقی سے دوسری شادی کی تھی جس کے بعد وہ دبئی منتقل ہوگئی تھی، عمر فاروقی سے اداکارہ کا ایک بیٹا بھی ہے۔
