وزیر اطلاعات پنجاب عظمیٰ بخاری نے کہا ہے کہ ایک مخصوص گروہ مشکل کی اس گھڑی میں متاثرین کے ساتھ ہمدردی کرنے کے بجائے سیاست چمکانے میں مصروف ہے، جبکہ پنجاب حکومت اپنے وسائل کے ذریعے متاثرہ شہریوں کو تمام امدادی سہولیات فراہم کر رہی ہے۔
ان کا کہنا تھا کہ 7 لاکھ 60 ہزار سیلاب متاثرین کو بروقت ریسکیو کرنا ایک بڑا کارنامہ ہے، مریم نواز کی اولین ترجیح انسانی جانوں کا تحفظ ہے۔
انہوں نے بتایا کہ متاثرہ افراد کے ساتھ ان کے مویشیوں کو بھی محفوظ مقامات پر منتقل کیا جا رہا ہے، جبکہ کلینک آن ویلز متاثرین کو فوری طبی امداد فراہم کرنے میں اہم کردار ادا کر رہا ہے۔
عظمیٰ بخاری نے کہا کہ مریم نواز کی ہدایات پر صوبے کے تمام کمشنر اور ڈپٹی کمشنر متاثرہ خاندانوں کو خیمے، چارپائیاں اور کھانا فراہم کر رہے ہیں۔
ان کا کہنا تھا کہ پنجاب کو تاریخ کے بڑے سیلاب کا سامنا ہے، اسی کے پیش نظر ایک بڑے پیمانے پر ریسکیو آپریشن جاری ہے۔
انہوں نے مزید کہا کہ کچھ لوگ فیک خبروں سے سوسائٹی میں انتشار پھیلانے کی کوشش کررہے ہیں، یہ وقت سیاست کا نہیں لوگوں کو ریلیف دینے کا ہے۔
ہمارا فوکس ریلیف پر ہے، مخصوص ٹولہ مشکل کی گھڑی میں متاثرین کے ساتھ ہمدردی کی بجائے گندی سیاست کررہا ہے، قوم کے جب بھی متحد ہونے کا موقع ہوتا ہے یہ ٹولہ اپنی گندی سیاست شروع کردیتا ہے۔
