بھارت کی جانب سے آبی جارحیت کا سلسلہ جاری ہے، سیلابی ریلوں کے باعث دریائے ستلج میں اونچے درجے کا سیلاب ہے، جبکہ دریا سے ملحقہ دیہات اور بستیاں سیلابی پانی کی زد میں آنے سے مکانات اور فصلیں تباہ ہوگئیں۔ جبکہ سیلابی پانی سے متاثرہ علاقوں میں امدادی سرگرمیاں جاری ہیں۔
پی ڈی ایم اے کی جانب سے دریائے ستلج میں سیلاب سے پنجاب کے مختلف اضلاع میں زیرآب آنے والے 480 دیہات اور موضع جات کی رپورٹ جاری کردی گئی ہے، سب سے زیادہ 155 دیہات اور موضع جات ضلع بہاولنگر میں زیر آب آئے ہیں۔
پی ڈی ایم اے کا کہنا ہے کہ بہاولنگر کے 155، قصور کے 93، وہاڑی کے 77، اوکاڑہ کے 76، بہاولپور کے 47 اور لودھراں کے 14 دیہات و موضع جات زیرآب ہیں۔
سیلاب سے مختلف اضلاع کے 480 دیہات و موضع جات متاثر ہیں، جبکہ سیلابی پانی سے متاثرہ علاقوں میں امدادی سرگرمیاں جاری ہیں۔
پی ڈی ایم اے کے مطابق بہاولنگر، قصور، اوکاڑہ، پاکپتن، لودھراں، وہاڑی اور بہاولپور سے 970 افراد کو ریسکیو کرلیا گیا ہے، جبکہ دریائے ستلج کی طغیانی اب کم ہونے لگی ہے۔
اس کے علاوہ 32 ہزار لوگوں کو علاج معالجے کی سہولیات مہیا کی گئیں جبکہ 300 متاثرہ خاندانوں میں راشن تقسیم کیا گیا۔
