الیکشن کمیشن آف پاکستان (ای سی پی) نے این اے 18 ہری پور میں انتخابی ضابطہ اخلاق کی مبینہ خلاف ورزی کے کیس میں وزیراعلیٰ خیبرپختونخوا سہیل آفریدی کو طلب کر لیا ہے۔ ای سی پی 10 دسمبر کو ضمنی انتخابات سے متعلق مختلف شکایات اور ضابطہ اخلاق کی خلاف ورزی کے کیسز کی سماعت کرے گا، جس کے لیے تمام فریقین کو نوٹسز جاری کیے جا چکے ہیں۔
سماعت میں سابق اپوزیشن لیڈر عمر ایوب کی اہلیہ، شہر ناز عمر ایوب کی درخواست بھی شامل ہوگی، جس میں فارم 47 کی عدم فراہمی، جعل سازی اور دیگر انتخابی بے ضابطگیوں کے الزامات عائد کیے گئے ہیں۔
ضمنی انتخاب کے نتائج کی فوری دوبارہ گنتی اور کنسولیڈیشن نوٹس جاری نہ کیے جانے کے خلاف دائر درخواستیں بھی اسی روز پیش ہوں گی۔
اسی کے ساتھ مسلم لیگ (ن) کے رہنما مرتضیٰ جاوید عباسی کی ڈی ایم او ایبٹ آباد کے فیصلے کے خلاف اپیل سننے کے لیے مقرر کی گئی ہے، جبکہ حذیفہ رحمٰن کی ڈی ایم او ڈیرہ غازی خان کے حکم کے خلاف اپیل بھی ای سی پی کے ایجنڈے کا حصہ ہوگی۔
پی پی 269 مظفرگڑھ کے مختلف پولنگ اسٹیشنز پر ری کاؤنٹنگ اور ری پولنگ کی درخواست بھی شامل ہے۔
محمد اقبال کی طرف سے حلقہ 269 میں ری رولنگ کی درخواست دائر پر بھی سماعت کی جائے گی۔
