اسلام آباد ہائیکورٹ نے جسٹس طارق محمود جہانگیری کی ڈگری جعلی قرار دے دی۔ اسلام آباد ہائیکورٹ میں جسٹس طارق محمود جہانگیری ڈگری کیس کی سماعت ہوئی، دوران سماعت کراچی یونیورسٹی کے رجسٹرار نے ڈگری سے متعلق اوریجنل ریکارڈ پیش کیا، جسٹس محمود جہانگیری کیخلاف کیس میں دلائل مکمل ہونے پر ججز اٹھ کر چیمبرچلے گئے۔
چیف جسٹس سرفراز ڈوگر اور جسٹس اعظم خان پر مشتمل بینچ نے محفوظ کیا گیا فیصلہ سنایا۔ فیصلہ سنانے سے قبل عدالت کی سیکیورٹی بھی سخت کر دی گئی تھی، عدالت نے جسٹس طارق محمود کی ڈگری کو جعلی قرار دیتے ہوئے انہیں عہدے کے لیے بھی نااہل قرار دے دیا۔
عدالت نے کہا کہ جسٹس طارق جہانگیری کی جب ہائی کورٹ جج تقرری ہوئی اس وقت ان کی ایل ایل بی کی ڈگری درست نہیں تھی۔ اسلام آباد ہائیکورٹ کے فیصلے کے مطابق جسٹس طارق محمود جہانگیری اس ڈگری کی بنیاد پر وکیل بننے کے بھی اہل نہیں ہیں۔
واضح رہے کہ ایک روز قبل ڈگری تنازع کیس میں جسٹس طارق جہانگیری کی جانب سے بینچ پر اٹھائے گئے دونوں اعتراضات مسترد کر دیے گئے تھے اور رجسٹرار کراچی یونیورسٹی کو ایل ایل بی ڈگری کا اوریجنل ریکارڈ لے کر 18 دسمبر کو پیش ہونے کا حکم دیا گیا تھا۔
اسلام آباد ہائی کورٹ نے جسٹس طارق جہانگیری ڈگری تنازع کیس کی سماعت کا تحریری حکم نامہ جاری کرتے ہوئے کہا تھا کہ جسٹس جہانگیری کے چیف جسٹس پر تعصب کے اعتراض کی کوئی قانونی بنیاد نہیں۔
