ترجمان موٹروے پولیس کے مطابق شدید دھند کے باعث موٹروے ایم 3 درخانہ سے رجانہ تک، موٹروے ایم 4 گوجرہ سے ملتان تک اور موٹروے ایم 5 ملتان سے ظاہر پیر تک ہر قسم کی ٹریفک کے لیے بند کر دی گئی ہیں.
موٹروے پولیس کا کہنا ہے کہ حدِ نگاہ میں نمایاں کمی کے باعث سفر انتہائی خطرناک ہو سکتا ہے، اسی لیے شہری غیر ضروری سفر سے گریز کریں۔
ترجمان نے خبردار کیا کہ دھند کے دوران لین کی خلاف ورزی سنگین حادثات کا سبب بن سکتی ہے۔ انہوں نے روڈ یوزرز کو ہدایت کی کہ لین ڈسپلن پرسختی سے عمل کریں اور کسی بھی صورت میں اوورٹیکنگ سے اجتناب کریں۔
موٹروے پولیس کے مطابق تیز رفتاری اور آگے والی گاڑی سے کم فاصلہ رکھنا حادثات کے خطرات کو کئی گنا بڑھا دیتا ہے، ترجمان سید عمران احمد نے شہریوں کو مشورہ دیا کہ ممکن ہو تو سفردن کے اوقات میں کریں۔
ان کے مطابق دھند کے دوران صبح 10 بجے سے شام 6 بجے تک کے اوقات نسبتاً محفوظ تصور کیے جاتے ہیں۔
انہوں نے ڈرائیور حضرات کو فوگ لائٹس کے استعمال پر زور دیتے ہوئے کہا کہ گاڑیوں کی ہیڈ اور فوگ لائٹس درست حالت میں ہونی چاہئیں تاکہ حدِ نگاہ بہتربنائی جا سکے۔
موٹروے پولیس نے ہدایت کی ہے کہ دورانِ سفر رفتار کم رکھیں، آگے چلنے والی گاڑی سے محفوظ فاصلہ برقرار رکھیں اور کسی بھی ہنگامی صورتحال میں فوری مدد کیلئے موٹروے پولیس ہیلپ لائن 130 پر رابطہ کریں۔
ترجمان نے کہا کہ شہریوں کی حفاظت موٹروے پولیس کی اولین ترجیح ہے اور موسم کی صورتحال بہتر ہوتے ہی موٹرویز کو مرحلہ وار کھول دیا جائے گا۔
