اسلام آباد کی عدالت نے پاکستان تحریک انصاف (پی ٹی آئی) کے رہنما مرزا شہزاد اکبر کو اشتہاری قرار دیتے ہوئے تحریری حکم نامہ جاری کر دیا ہے۔ جوڈیشل مجسٹریٹ محمد عباس شاہ نے مرزا شہزاد اکبر کو اشتہاری قرار دینے کے ساتھ ہی ان کے وارنٹ گرفتاری بھی جاری کرنے کا حکم دیا۔
تحریری حکم کے مطابق، مرزا شہزاد اکبر کو متعدد بار عدالت میں پیش ہونے کے لیے طلب کیا گیا، لیکن وہ کسی بھی پیشی پر حاضر نہ ہوئے، جس کے بعد عدالت نے انہیں اشتہاری قرار دینے کا فیصلہ سنایا۔
ذرائع کے مطابق، مرزا شہزاد اکبر کے خلاف مقدمے کا چالان بھی عدالت میں جمع کرا دیا گیا ہے۔
ان پر جولائی 2025 میں این سی سی آئی اے نے مقدمہ درج کیا تھا، جس میں الزام تھا کہ انہوں نے سوشل میڈیا پلیٹ فارم ایکس (سابق ٹویٹر) پر متنازع بیانات جاری کیے۔
عدالتی فیصلے کے بعد متعلقہ اداروں کو شہزاد اکبر کی گرفتاری کے لیے فوری اقدامات کرنے کی ہدایات بھی جاری کر دی گئی ہیں۔
