یوٹیوبر سعد الرحمان، جنہیں ڈکی بھائی کے نام سے جانا جاتا ہے، کو کیمپ جیل لاہور سے رہا کر دیا گیا ہے۔
ذرائع کے مطابق عدالت کی جانب سے آج ان کی روبکار جاری ہونے کے بعد رہائی عمل میں آئی۔
گزشتہ پیر کو لاہور ہائیکورٹ نے جوئے کی ایپس کی پروموشن سے متعلق مقدمے میں ڈکی بھائی کی 10 لاکھ روپے کے مچلکوں کے عوض ضمانت منظور کی تھی۔
سماعت کے دوران جسٹس شہرام سرور نے ریمارکس دیے تھے کہ سپریم کورٹ کے فیصلے کے مطابق اس نوعیت کے کیسز میں ضمانت نہ دینا غیر معمولی بات ہوگی۔
گزشتہ روز بروقت روبکار جاری نہ ہونے کی وجہ سے ڈکی بھائی کو رہا نہیں کیا جا سکا تھا، تاہم آج جوڈیشل مجسٹریٹ نعیم بھٹو نے رہائی کا حکم دیتے ہوئے کہا کہ اگر وہ کسی اور کیس میں مطلوب نہیں تو انہیں فوراً رہا کیا جائے۔
ڈکی بھائی کے خلاف ایف آئی اے کے نیشنل کرائم ایجنسی ونگ میں آن لائن جوا فروغ دینے کے الزام میں مقدمہ درج ہے جبکہ تحقیقات بدستور جاری ہیں۔
رہائی کے موقع پر ڈکی بھائی کے اہلِ خانہ اور قریبی دوست بھی موجود تھے۔
