وفاقی حکومت نے سویلین اور ملٹری قیادت کے تعلقات میں دراڑ پڑنے کے حوالے سے گردش کرنے والی قیاس آرائیوں کو مسترد کرتے ہوئے کہا ہے کہ یہ دعوے “بے بنیاد” اور “گمراہ کن” ہیں۔ سابق پرنسپل سیکرٹری ٹو پرائم منسٹر اور کابینہ کے قریبی مشیر ڈاکٹر توقیر شاہ نے واضح کیا کہ سوشل میڈیا اور بعض سیاسی حلقوں میں زیر گردش افواہوں میں کوئی صداقت نہیں ہے کہ حکومت اور فیلڈ مارشل عاصم منیر کے درمیان کشیدگی پائی جاتی ہو۔
انہوں نے کہا کہ چیف آف آرمی اسٹاف / چیف آف ڈیفنس فورس کے نوٹیفکیشن میں تاخیر کے حوالے سے جو قیاس آرائیاں کی جا رہی ہیں، وہ حقیقت پر مبنی نہیں۔ سویلین اور ملٹری قیادت کے درمیان تعلقات مکمل طور پر ہم آہنگ اور پر سکون ہیں۔
ڈاکٹر توقیر شاہ نے مزید کہا کہ نون لیگ کے رہنما اور سابق وزیراعظم نواز شریف فیلڈ مارشل عاصم منیر کا بہت احترام کرتے ہیں اور متعدد مواقع پر ان کی پیشہ ورانہ مہارت، عزم اور قوم کی خدمت کے جذبے کی تعریف کر چکے ہیں۔
انہوں نے بتایا کہ نواز شریف نے 27 ویں آئینی ترمیم کے حق میں ووٹ دیا، جس سے ان کی ادارہ جاتی ڈھانچے اور فوجی قیادت کی حمایت اور عزم ظاہر ہوتا ہے۔
تمام افواہوں اور نوٹیفکیشن میں تاخیر کے حوالے سے جاری قیاس آرائیوں کو ڈاکٹر توقیر شاہ نے محض شرارت قرار دیا اور کہا کہ یہ خبریں بے بنیاد ہیں۔
انہوں نے کہا کہ قیاس آرائیوں پر مبنی بیانیے سے کچھ حاصل نہیں ہوتا سوائے اس کے کہ صرف کنفیوژن پھیلے وہ بھی اُس وقت جب استحکام اور اتحاد کی ضرورت ہو۔
ڈاکٹر توقیر شاہ نے زور دے کر کہا کہ منتخب حکومت اور فوجی قیادت کے درمیان غیر معمولی طور پر ہم آہنگ تعلق موجود ہے، قومی ترجیحات اور مقاصد کے حصول کیلئے دونوں میں مکمل طور پر اتفاق رائے پایا جاتا ہے، اور اس کے برعکس کوئی بھی بات بے بنیاد ہے۔
